Бразилия президенти Жаир Болсонару АҚШ президенти сайловларида овозларни ҳисоблаш жараёнида фирибгарлик юз бергани борасида далилларга эга эканлигини айтди, деб ёзади «РБК».
«Менда ахборот манбалари бор… уларнинг кимлигини айтмайман, майлими? У ерда ростдан ҳам кўп сонли қалбакилаштириш ҳолатлари бўлган», — деди Болсонару матбуот билан мулоқот чоғида.
У сайлов натижалари ҳақидаги якуний қарорни АҚШ Олий суди қабул қиладиган вазият юзага келиши мумкинлигини қўшиб қўйди.
Эслатиб ўтамиз, АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади ва сайлов бўйича судга мурожаат қилишини билдирди. У сайловлар қонунбузарликлар билан ўтган деган фикрда, шунингдек, сайловларда мамлакат конституцияси бузилганини айтган.
Кейинроқ Дональд Трамп маъмурияти Жо Байденга ҳокимиятни топширишга тайёрлигини билдирган эди. Шундан кейин Байден ўз маъмуриятининг асосий аъзоларини шахсан таништирди. Шунингдек, демократ Жозеф Байденга разведка томонидан давлат раҳбари учун тайёрланадиган кунлик махфий ҳисоботларни тақдим этишга рухсат берилди.
Баъзи чет мамлакатлар раҳбарлари, хусусан, Франция, Исроил, Украина, Венесуэла президентлари ва Канада бош вазири Жо Байденни давлат раҳбари лавозимига сайлангани билан табриклашга улгурди.
Изоҳ (0)