Amerikalik hip-hop qo‘shiqchi Kanye Uest do‘stlariga Rossiyada ishlab chiqarilgan “Sherp” yo‘ltanlamasini sovg‘a qilishni davom etmoqda: sentabrda shu kabi mashinani reper Tauxid Epps qo‘lga kiritgan edi, 25-noyabr kuni esa Kris Braun shu kabi sovg‘a bilan o‘zining Instagram’dagi sahifasida maqtandi, deb yozadi Motor.
Sovg‘a Kanye Uest tomonidan amalga oshirilganiga shubha yo‘q — birinchidan, Kris Braun surat ostidagi izohda do‘stiga minnatdorchilik bildirgan, ikkinchidan esa aynan Uest “Sherp”larni urfga kirgizdi. Yo‘ltanlamaslar reperning kliplarida bir necha bor ko‘rinish bergan, bir safar hatto Parijdagi Modalar haftaligi davomida Yeezy brendining dekoratsiyasi vazifasini bajargan.
“Sherp” peterburglik muhandis Aleksey Garagashyanning chizmalari asosida yaratilgan. Yo‘ltanlamas germetik kuzov va 1600 millimetrli pokrishkalarga ega. Bundan tashqari, u tom ma’noda joyida aylana oladi. “Sherp” uzunligi 3500 millimetrni, eni 2520 millimetrni tashkil etadi, mashina osti va yo‘l yuzi orasidagi masofa 600 millimetr. Xorijda “Sherp”ning eng arzon versiyasi 96 ming dollarga baholanadi.
Mashina 44 ot kuchiga ega 1,5 litrli Kubota dizel motori yordamida harakatga kelib, besh pog‘onali mexanik uzatmalar qutisi yordamida boshqariladi. Maksimal tezligi soatiga 45 kilometrni tashkil etadi, suvda esa 6 km/soat tezlikda harakatlana oladi.
Avvalroq Kanye Uest xotini Kim Kardashyanga marhum otasining gologrammasini sovg‘a qilgani, “qayta tirilgan” Robert Kardashyan raqsga tushib, Kanyeni daho deb atagani to‘g‘risida xabar berilgandi.
Izoh (0)