AQShning Ayova shtatida 1996-yilgi Chevrolet Silverado pikapi platformasida yaratilgan yo‘ltanlamas limuzin sotuvga qo‘yildi. Bazmlarga minib borish uchun mo‘ljallangan avtomobil 185 ming kilometr yo‘l bosgan bo‘lib, uni 17 ming dollar evaziga xarid qilish mumkin, deb yozadi Motor.
Limuzin Chevrolet Silverado bazasida yaratilgan. Sotuvchining so‘zlariga ko‘ra, 1990-yillarda pikapning kuzovi ikkiga bo‘lingan, avtomobilga qo‘shimga o‘q o‘rnatilgan va “podveska”si modifikatsiya qilingan. Yo‘ltanlamas limuzin saloniga 12 kishi sig‘a oladi.
Limuzinning ichida turli bazmlarni o‘tkazish uchun barcha zaruriy narsalar mavjud. Avtomobilga charm bilan qoplangan uchta divan, televizor, shuningdek, mini-bar va qo‘shimcha audiotizim o‘rnatilgan. Bundan tashqari, salondan to‘g‘ri yuk bo‘lmasiga ham o‘tish mumkin.
Yo‘ltanlamas limuzin kapoti ostidan 190 ot kuchi va 525 Nm aylanuvchi momentga ega 6,5 litrli Detroit Diesel V8 o‘rin olgan. Dizelli agregat to‘rt pog‘onali avtomatik uzatmalar qutisi bilan birgalikda ishlaydi. Bundan tashqari, avtomobil to‘liq uzatmaga ulana oladigan tizim bilan jihozlangan.
Modifikatsiyaga uchragan ushbu avtomobil yaratilganiga 24 yil bo‘lganiga qaramay, u 185 ming kilometrgina yo‘l bosgan. Sotuvchi undan 17 ming dollar evasiga “ajralish”ga tayyor.
Eslatib o‘tamiz, sentabr oxirlarida Kolorado shtatida Chevrolet Silverado pikapi bazasida yaratilgan noodatiy limuzin sotuvga qo‘yilgan edi.
Izoh (0)