Kanadaning Yangi Shotlandiya provinsiyasida istiqomat qiladigan Jeyms Blekvud 25 yildan beri mahalliy o‘rmonda yashaydigan yenotlarga g‘amxo‘rlik qiladi. Bu haqda Esquire xabar beradi.
Blekvud You Tube’dagi “Yenot avrovchisi” kanalida ushbu hayvon suratga tushirilgan videolar bilan bo‘lishib boradi.
https://youtu.be/Ofp26_oc4CA
Bir necha yildan beri video joylab boradigan erkakning so‘nggi videolaridan biri boshqalaridan farqli o‘laroq 10 million marta tomosha qilingan. Shundan keyin OAV kanadalik erkakka e’tibor qaratgan. Videoda Jeyms yenotlarga sosiska, pechenye va kuchuklarning maxsus taomini berayotganini ko‘rish mumkin. Kadrlarga qarab hayvonlar Jeymsni o‘zlariniki deb bilishi va hech qanday qo‘rquvsiz tizzasiga va yelkasiga chiqib olishini ko‘rish mumkin.
Erkakning aytishicha, u yenotlarga g‘amxo‘rlik qilishni rafiqasi bilan birga boshlagan. Ushbu g‘oyaning egasi bo‘lgan turmush o‘rtog‘i 2003-yilda saraton tufayli vafot etgan. Hayotdan ko‘z yumushidan avval u Jeymsdan yenotlar va o‘zlarining ikki mushugiga g‘amxo‘rlik qilishda davom etishini so‘ragan. Shundan buyon u rafiqasiga bergan so‘zining ustidan chiqishda davom etib kelmoqda.
https://youtu.be/PHwmCwoqdKA
Blekvudning qo‘shimcha qilishicha, kanalidagi kuzatuvchilar unga bir necha marta mablag‘ va sovg‘a bermoqchi bo‘lgan, lekin u qabul qilishdan bosh tortgan. Buning o‘rniga u kuzatuvchilarni o‘zlariga yaqin yerdagi hayvon himoya qiluvchilarga xayriya qilishga chaqiradi.
Jeyms g‘amxo‘rlik qiladigan yenotlar nafaqat sosiskalarni, balki kuchuklar taomini ham xush ko‘radi. Bloger, shuningdek, ularni ko‘pchigan qaymoq va yong‘oq yog‘i qo‘shilgan buterbrodlar bilan ham mehmon qiladi.
Izoh (0)