Kanadada AQSh chegarasini noqonuniy kesib o‘tmoqchi bo‘lgan ayiq bolasi qo‘lga olindi

Enni laqabli ayiq bolasi Kanadaning Britaniya Kolumbiyasi chegarasidan AQSh hududiga o‘tmoqchi bo‘lgan. Harbiylar tomonidan qo‘lga olingan ayiq Smither’s Northern Lights Wildlife Society yovvoyi tabiatni himoya qilish jamiyati vakillariga topshirilgan, deb yozadi “Domashniy ochag” jurnali.

Ushbu ayiq onasini erta yo‘qotgan, mutaxassislar uning onasini mashina urib ketganini taxmin qilmoqda. Enni laqabli yetim qolgan ayiq o‘rmonni kezib yurgan va och qolgan.

Yegulik topa olmaganidan keyin tirik qolish uchun odamlar bor yerga chiqishga qaror qilgan. Uni tutish qiyin bo‘lmagan, qafas ichiga taom qo‘yilganidan keyin och qolgan ayiq qafas ichiga yugurib kirib olgan.

Ayni vaqtda u mutaxassislar kuzatuvi ostida, Smither’s Northern Lights Wildlife Society jamiyati xodimlari uni qish tugaguniga qadar boshqa 33 qora ayiq va 3 ayiq bolasi bilan birga boshpanada ushlab turishni, yozga yaqin yovvoyi tabiatga qo‘yib yuborishni rejalashtirmoqda.