O‘zbekiston Prezidenti Shavkat Mirziyoyev raisligida 24-noyabr kuni hududlarda tadbirkorlikni qo‘llab-quvvatlash bo‘yicha ko‘rilayotgan chora-tadbirlar natijadorligi hamda xizmatlar sohasini rivojlantirishga doir kelgusi vazifalar muhokamasiga bag‘ishlangan videoselektor yig‘ilishi o‘tkazildi.
Yig‘ilishda davlat rahbarining ma’lum qilishicha, Sirdaryo viloyatida 10 oyda 12 mingta doimiy ish o‘rni tashkil etilgan. Natijada “temir daftar”ga kiritilgan ishsiz fuqarolarning qariyb 90 foizi bandligi ta’minlangan. Yil rejasi 130 foizga bajarilgan.
Shuningdek, Qashqadaryo viloyatining Qarshi shahri va Kitob tumani, Navoiy viloyatining Qiziltepa, Uchquduq, Navbahor tumanlari va Zarafshon shahrida ham ish o‘rni yaratiish bo‘yicha rejalar ortig‘i bilan bajarilgan.
Biroq Buxoro tumanida yangi o‘rinlari yaratish rejasi 30 foizga bajarilgan. Shuningdek, Jondor tumanida ham bu borada yetarli choralar ko‘rilmagan. “Prezident shuncha ishonch bildirib, Do‘stov va Kamolovni tuman hokimi qildi. Lekin ular umuman natijaga ishlamagani uchun bugun ikkovini ham ishdan oldi, butun respublika hokimlari bilsin”, — dedi prezident.
“Hamma bo‘yicha xulosa bo‘ladi. ‘Qizil’dan chiqmaganlar yil yakunigacha ketadi… Hokim ketdimi, ikkita tumandagi to‘rtta sektor ham ketishi kerak. Hamma harakatlarimiz xalqimizning og‘irini yengil qilish, imkoniyatlar yaratishga qaratilgan. Lekin biz qo‘ygan hokimlar to‘g‘ri tushunmayapti. Endi faqat odamlarni rozi qilgan tuman hokimiga orden beramiz, lavozimini ko‘taramiz. Boshqa hech qanday ko‘rsatkich bizni qiziqtirmaydi”, — dedi Shavkat Mirziyoyev.
Prezidentning ma’lum qilishicha, 10 oy ichida bosh vazir qabulxonalariga 66 mingta murojaat kelib tushgan. “Ularning 80-90 foizini, mana biz tahlil qildik, tuman va viloyat darajasida hal etsa bo‘lar ekan. Bu degani, bizdagi tadbirkorlik darajasi tuman, shahar, viloyatda talab darajasida emas”, — deya ta’kidladi davlat rahbari.
“Sirdaryo tumani (rahbari) Muhammadiyev yil boshida tadbirkorlar muammolarini kamaytirish bo‘yicha va’dalar bergan bo‘lsa ham, o‘z muammolari bilan murojaat qilgan tadbirkorlar soni ikki baravarga oshgan”, — dedi prezident. Shu sababli davlat rahbari Sirdaryo viloyati hokimi G‘ofur Mirzayevga Sirdaryo tumani hokimi Muhammadiyevni o‘z lavozimidan ozod etish bo‘yicha topshiriq berdi.
Prezident har bir tumanda yoshlarning kichik sanoat zonasi tashkil etilishini ma’lum qildi.
Eslatib o‘tamiz, Shavkat Mirziyoyev 24-sentabr kuni hududlarda tadbirkorlikni rivojlantirish bo‘yicha qo‘shimcha chora-tadbirlar muhokamasi yuzasidan o‘tkazilgan videoselektor yig‘ilishida rivojlanish darajasi qoniqarsiz bo‘lgan 33 ta tuman rahbarlari ishdan olinishini aytgandi.
Shuningdek, Shavkat Mirziyoyev raisligida 8-iyul kuni o‘tkazilgan videoselektor yig‘ilishida ish o‘rni yaratish bo‘yicha yaxshi natija ko‘rsatmagan tuman va tashkilot rahbarlari ishdan olingandi.
Izoh (0)