Ўзбекистон Президенти Шавкат Мирзиёев раислигида 24 ноябрь куни ҳудудларда тадбиркорликни қўллаб-қувватлаш бўйича кўрилаётган чора-тадбирлар натижадорлиги ҳамда хизматлар соҳасини ривожлантиришга доир келгуси вазифалар муҳокамасига бағишланган видеоселектор йиғилиши ўтказилди.
Йиғилишда давлат раҳбарининг маълум қилишича, Сирдарё вилоятида 10 ойда 12 мингта доимий иш ўрни ташкил этилган. Натижада «темир дафтар»га киритилган ишсиз фуқароларнинг қарийб 90 фоизи бандлиги таъминланган. Йил режаси 130 фоизга бажарилган.
Шунингдек, Қашқадарё вилоятининг Қарши шаҳри ва Китоб тумани, Навоий вилоятининг Қизилтепа, Учқудуқ, Навбаҳор туманлари ва Зарафшон шаҳрида ҳам иш ўрни яратииш бўйича режалар ортиғи билан бажарилган.
Бироқ Бухоро туманида янги ўринлари яратиш режаси 30 фоизга бажарилган. Шунингдек, Жондор туманида ҳам бу борада етарли чоралар кўрилмаган. «Президент шунча ишонч билдириб, Дўстов ва Камоловни туман ҳокими қилди. Лекин улар умуман натижага ишламагани учун бугун икковини ҳам ишдан олди, бутун республика ҳокимлари билсин», — деди президент.
«Ҳамма бўйича хулоса бўлади. ‘Қизил’дан чиқмаганлар йил якунигача кетади… Ҳоким кетдими, иккита тумандаги тўртта сектор ҳам кетиши керак. Ҳамма ҳаракатларимиз халқимизнинг оғирини енгил қилиш, имкониятлар яратишга қаратилган. Лекин биз қўйган ҳокимлар тўғри тушунмаяпти. Энди фақат одамларни рози қилган туман ҳокимига орден берамиз, лавозимини кўтарамиз. Бошқа ҳеч қандай кўрсаткич бизни қизиқтирмайди», — деди Шавкат Мирзиёев.
Президентнинг маълум қилишича, 10 ой ичида бош вазир қабулхоналарига 66 мингта мурожаат келиб тушган. «Уларнинг 80-90 фоизини, мана биз таҳлил қилдик, туман ва вилоят даражасида ҳал этса бўлар экан. Бу дегани, биздаги тадбиркорлик даражаси туман, шаҳар, вилоятда талаб даражасида эмас», — дея таъкидлади давлат раҳбари.
«Сирдарё тумани (раҳбари) Муҳаммадиев йил бошида тадбиркорлар муаммоларини камайтириш бўйича ваъдалар берган бўлса ҳам, ўз муаммолари билан мурожаат қилган тадбиркорлар сони икки бараварга ошган», — деди президент. Шу сабабли давлат раҳбари Сирдарё вилояти ҳокими Ғофур Мирзаевга Сирдарё тумани ҳокими Муҳаммадиевни ўз лавозимидан озод этиш бўйича топшириқ берди.
Президент ҳар бир туманда ёшларнинг кичик саноат зонаси ташкил этилишини маълум қилди.
Эслатиб ўтамиз, Шавкат Мирзиёев 24 сентябрь куни ҳудудларда тадбиркорликни ривожлантириш бўйича қўшимча чора-тадбирлар муҳокамаси юзасидан ўтказилган видеоселектор йиғилишида ривожланиш даражаси қониқарсиз бўлган 33 та туман раҳбарлари ишдан олинишини айтганди.
Шунингдек, Шавкат Мирзиёев раислигида 8 июль куни ўтказилган видеоселектор йиғилишида иш ўрни яратиш бўйича яхши натижа кўрсатмаган туман ва ташкилот раҳбарлари ишдан олинганди.
Изоҳ (0)