Toshkent shahrida 50 foiz davlat xizmatlari agentligi xodimlari attestatsiyadan o‘ta olmagan. Bu haqda adliya vaziri Ruslanbek Davletov adliya tizimi va norma ijodkorligi bo‘yicha o‘tkazilgan onlayn muloqotda ma’lum qilgan.
Jumladan, vazir “Nima uchun Buxoro tumani yagona darcha xizmatida STIR (INN) olish uchun fuqarolardan pul talab qiladi. Plastik kartadan to‘laymiz desak, naqd pul talab qilishadi. Shu qonuniymi?”, degan savolga javob berish paytida agentlik tizimida ortiqcha pul olish bilan bog‘liq muammo saqlanib qolayotganini aytib o‘tgan.
INN olish uchun hech qanday to‘lov qilmaslik kerak. Agar Buxoro tumanida shunday holat bo‘lgan bo‘lsa, videoga yozib olib, bizga bersangiz, bu biz uchun juda favqulodda holat. Davlat xizmatlari agentligi tizimida har bitta markazga xizmatlardan oyliklariga daromad keladigan to‘g‘ridan to‘g‘ri tizim qilganmiz. Nima uchun? Rag‘batlantirish uchun, o‘g‘rilik, tovlamachilik qilmasin, odamlardan pul talab qilmasin, ortiqcha to‘lov qilmasin, degan maqsadda qilganmiz. Agar shunday holat bo‘lsa, qattiq chora ko‘ramiz. Toshkent shahrida 50 foiz davlat xizmatlari agentligi xodimlari attestatsiyadan o‘ta olmagan. Nimaga? Aynan mana shunday kamchiliklari uchun.Vazir notariat sohasida ham ortiqcha pul olish, undirishga qarshi kurashilayotgani, fuqarolar qaysi xizmat uchun davlatga qancha pul to‘lashni bilishi uchun SMS xabarnoma tizimi yo‘lga qo‘yilganini qayd etgan.Ruslanbek Davletov, adliya vaziri
“Xususiy notarius bo‘lsa ham shunday qilishi kerak, chunki u xususiy bo‘lsa ham tekinga ishlayotgani yo‘q, uning ichida oladigan qismi bor, kun ko‘ryapti. Shundan xodimlariga oylik to‘layapti. Bugun notariuslarning xizmatidan olayotgan pullari juda kam emas, yaxshigina daromad qilishyapti”, — deydi u.
Davletov, shuningdek, 2021-yilni adliya tizimida ichki nazorat uchun “Davlat xizmatlari yili”, deb e’lon qilinganini bildirdi. Bundan ko‘zlangan maqsad xalqqa xizmat qilishda byurokratiyani, qog‘ozbozlikni yo‘qotish, davlat organlari bilan munosabatda yangicha davrni boshlab berish uchun tegishli qarorlar tayyorlab hukumatga taqdim etilishini, bu boradagi ishlar yangicha ko‘rib chiqilishini bildirdi.
Eslatib o‘tamiz, avvalroq 2020-yilning 9 oyida O‘zbekistonda huquqni muhofaza qiluvchi organlar tomonidan jami 838 ta korrupsiya holatlari yuzasidan jinoyat ishlari qo‘zg‘atilgani, jinoiy javobgarlikka tortilgan mansabdor shaxslarning 1 nafari adliya sohasidan ekanligi xabar qilingan edi. Shuningdek, FHDYo idoralari xodimlari tomonidan tug‘ilganlik to‘g‘risidagi guvohnomalarni rasmiylashtirishda ortiqcha mablag‘ undirilayotgani borasida Davlat xizmatlari agentligi fuqarolarga eslatmalar bilan chiqqan.
Mavzuga doir:
Izoh (0)