Тошкент шаҳрида 50 фоиз давлат хизматлари агентлиги ходимлари аттестациядан ўта олмаган. Бу ҳақда адлия вазири Русланбек Давлетов адлия тизими ва норма ижодкорлиги бўйича ўтказилган онлайн мулоқотда маълум қилган.
Жумладан, вазир «Нима учун Бухоро тумани ягона дарча хизматида СТИР (ИНН) олиш учун фуқаролардан пул талаб қилади. Пластик картадан тўлаймиз десак, нақд пул талаб қилишади. Шу қонунийми?», деган саволга жавоб бериш пайтида агентлик тизимида ортиқча пул олиш билан боғлиқ муаммо сақланиб қолаётганини айтиб ўтган.
ИНН олиш учун ҳеч қандай тўлов қилмаслик керак. Агар Бухоро туманида шундай ҳолат бўлган бўлса, видеога ёзиб олиб, бизга берсангиз, бу биз учун жуда фавқулодда ҳолат. Давлат хизматлари агентлиги тизимида ҳар битта марказга хизматлардан ойликларига даромад келадиган тўғридан-тўғри тизим қилганмиз. Нима учун? Рағбатлантириш учун, ўғрилик, товламачилик қилмасин, одамлардан пул талаб қилмасин, ортиқча тўлов қилмасин, деган мақсадда қилганмиз. Агар шундай ҳолат бўлса, қаттиқ чора кўрамиз. Тошкент шаҳрида 50 фоиз давлат хизматлари агентлиги ходимлари аттестациядан ўта олмаган. Нимага? Айнан мана шундай камчиликлари учун.Вазир нотариат соҳасида ҳам ортиқча пул олиш, ундиришга қарши курашилаётгани, фуқаролар қайси хизмат учун давлатга қанча пул тўлашни билиши учун SMS хабарнома тизими йўлга қўйилганини қайд этган.Русланбек Давлетов, адлия вазири
«Хусусий нотариус бўлса ҳам шундай қилиши керак, чунки у хусусий бўлса ҳам текинга ишлаётгани йўқ, унинг ичида оладиган қисми бор, кун кўряпти. Шундан ходимларига ойлик тўлаяпти. Бугун нотариусларнинг хизматидан олаётган пуллари жуда кам эмас, яхшигина даромад қилишяпти», — дейди у.
Давлетов, шунингдек, 2021 йилни адлия тизимида ички назорат учун «Давлат хизматлари йили», деб эълон қилинганини билдирди. Бундан кўзланган мақсад халққа хизмат қилишда бюрократияни, қоғозбозликни йўқотиш, давлат органлари билан муносабатда янгича даврни бошлаб бериш учун тегишли қарорлар тайёрлаб ҳукуматга тақдим этилишини, бу борадаги ишлар янгича кўриб чиқилишини билдирди.
Эслатиб ўтамиз, аввалроқ 2020 йилнинг 9 ойида Ўзбекистонда ҳуқуқни муҳофаза қилувчи органлар томонидан жами 838 та коррупция ҳолатлари юзасидан жиноят ишлари қўзғатилгани, жиноий жавобгарликка тортилган мансабдор шахсларнинг 1 нафари адлия соҳасидан эканлиги хабар қилинган эди. Шунингдек, ФҲДЁ идоралари ходимлари томонидан туғилганлик тўғрисидаги гувоҳномаларни расмийлаштиришда ортиқча маблағ ундирилаётгани борасида Давлат хизматлари агентлиги фуқароларга эслатмалар билан чиққан.
Изоҳ (0)