Namangan viloyatida iste’molchilar tomonidan elektr energiyasi ta’minoti bo‘yicha shahar-tuman tezkor dispetcherlik xizmatlariga 10 kunda 70 mingdan ortiq telefon orqali qo‘ng‘iroq bo‘lgan. Bu haqda viloyat hududiy elektr tarmoqlari korxonasi direktori Jahongir Rizayev ma’lum qildi, deya xabar beradi “Daryo” muxbiri Azizbek Abduvaliyev.
Rizayevga ko‘ra, murojaatlarning asosiy qismi Namangan shahri, Uychi, Pop va Chust tumanlariga to‘g‘ri kelgan.
“Ko‘pincha elektr tarmoqlari idorasidagi dispetcherlarning telefonlari atayin o‘chirib qo‘yiladi, ishlamaydi, degan e’tirozlarni eshitamiz. Bu e’tirozlarga oydinlik kiritish maqsadida shahar telefonlari va mobil aloqa orqali kelib tushgan qo‘ng‘iroqlarni tahlil qildik. Ularning aksariyati, albatta, o‘chirishlar va avariyalar bilan bog‘liq. Ob-havo keskin sovib ketganini inobatga olib, imkon qadar bu muammolarni tezlik bilan bartaraf etishga harakat qilyapmiz”, — deydi Rizayev.
Ta’kidlanishicha, viloyatdagi mavjud elektr qurilmalarining 33 foizi yoki 2055 ta transformator punkti va 8665 kilometr elektr uzatish tarmog‘i 40 yil va undan ko‘p ishlagan. Hozirda ularni bosqichma-bosqich yangilash ishlari olib borilmoqda.
Jurnalist va blogerlar uchun tashkil etilgan matbuot anjumanida ma’lum qilinishicha, viloyatga joriy yil 10 oyi davomida 2 900,6 million kilovatt-soat elektr energiyasi yetkazib berilgan. Bu o‘tgan yilning shu davriga nisbatan 410,5 million kilovatt-soat yoki 16,5 foizga ko‘p. Jumladan, aholiga 300,3 million kilovatt-soat yoki 88,6 milliard so‘mlik elektr energiyasi ko‘p yetkazib berilgan.
Izoh (0)