O‘zbekiston Bandlik va mehnat munosabatlari vazirining tegishli buyrug‘i bilan Tashqi mehnat migratsiyasi agentligi boshlig‘iga yangi o‘rinbosarlar tayinlandi.
Agentlik matbuot xizmati xabariga ko‘ra, Xo‘jaakbar Fayzullaxo‘jayev va Azizbek Yunusov Tashqi mehnat migratsiyasi agentligi boshlig‘i o‘rinbosarlari etib tayinlandi.
Xo‘jaakbar Fayzullaxo‘jayev bunga qadar Yunusobod tuman hokimining investitsiyalar va tashqi savdo masalalari bo‘yicha o‘rinbosari lavozimida faoliyat yuritgan.
Azizbek Yunusov bunga qadar Mirobod tumani hokimi o‘rinbosari — tuman investitsiyalar va tashqi savdo bo‘limi boshlig‘i lavozimida faoliyat yuritgan.
2020-yilning iyul oyida Tashqi mehnat migratsiyasi agentligiga boshliq tayinlanib, ushbu lavozimni 2018-yildan Namangan viloyat Bandlik bosh boshqarmasi boshlig‘i sifatida ishlab kelayotgan Muhammadzokir Mamatxonov egallagandi.
Eslatib o‘tamiz, 2018-yilda Tashqi mehnat migratsiyasi masalalari agentligi sobiq rahbariyatiga nisbatan jinoyat ishi qo‘zg‘atilgandi. Ular pora olish, pora berish, jinoiy faoliyatdan olingan daromadlarni legallashtirish va kompyuter axborotidan qonunga xilof ravishda foydalanish moddalarida nazarda tutilgan jinoyatlarni sodir etganlikda ayblangan. 2019-yilning avgust oyida ularga nisbatan sud hukmi e’lon qilingan.
Izoh (0)