Saudiya Arabistoni tashqi ishlar vaziri Faysal bin Farhon al-Saud qirollikda valiahd shahzoda Muhammad bin Salmon Isroil bosh vaziri Binyamin Netanyaxu va AQSh davlat kotibi Maykl Pompeo o‘rtasida o‘tkazilgan maxfiy uchrashuv haqidagi ommaviy axborot vositalarida berilgan xabarlarni rad etdi. Bu haqda “Interfaks” xabar berdi.
“Men davlat kotibi Pompeoni Neom shahridagi aeroportda kutib oldim va valiahd shahzoda bilan uchrashuvda ishtirok etdim. U yerda isroilliklar yo‘q edi”, — dedi vazir Al-Arabiya telekanaliga.
Shuningdek, u Twitter’da OAV xabar bergan uchrashuv hech qachon bo‘lmaganligini hamda faqat Saudiya Arabistoni va AQSh vakillari muzokara olib borganini yozgan.
Avvalroq Axios yangiliklar portali Isroildagi manbalariga asoslanib, valiahd shahzodaning Netanyaxu va Pompeo bilan muzokaralari, shuningdek, Mossad direktori Yossi Koenning uchrashuvda ishtirok etgani haqida xabar bergan. Portalning ta’kidlashicha, Netanyaxuning idorasi ushbu ma’lumotlarni tasdiqlamagan, ammo ularni rad ham etmagan.
22-noyabr, yakshanba kuni Netanyaxuning idorasi hukumatning haftalik yig‘ilishini unga ko‘proq tayyorgarlik ko‘rish kerakligini aytib qoldirgan. Biroq, “uchrashuvning keyinga qoldirilishining asl sababi aynan Netanyaxuning Saudiya Arabistoniga safari edi”, deyiladi manbalarda.
O‘z navbatida, Axios’ning ta’kidlashicha, de-fakto “Isroil va Saudiya Arabistoni rahbarlari o‘rtasidagi munosabatlar azaldan mavjud bo‘lgan, ammo ular sir tutilgan va bu qadar yuqori darajadagi uchrashuv, garchi ikkala tomon rasmiy ravishda tasdiqlamagan bo‘lsa ham, manbalar xabar bergan birinchi uchrashuv hisoblanadi”.
Shuningdek, Axios Isroil va Saudiya Arabistoni AQSh prezidentlik saylovlarida g‘olibligini e’lon qilgan Jo Baydenning Eron bilan yadroviy kelishuvga oid rejalaridan xavotirda ekanlikligiga e’tibor qaratdi.
Eslatib o‘tamiz, Isroil—Falastin masalasida oldinga siljish yo‘qligiga qaramay, 2020-yilda Donald Tramp ma’muriyati birdaniga uchta arab mamlakatini yahudiy davlati bilan yarashtirishga muvaffaq bo‘ldi. Sentabr oyida Bahrayn va Birlashgan Arab Amirliklari Isroil bilan tinchlik bitimlarini imzoladi (BAA bilan qisqa vaqt ichida vizasiz rejim to‘g‘risida kelishuvga erishildi), oktabrda Sudan bilan ham tinchlik kelishuviga erishildi.
Izoh (0)