Саудия Арабистони Ташқи ишлар вазирлиги валиаҳд шаҳзоданинг Исроил бош вазири билан музокара олиб борганини рад этди

Саудия Арабистони ташқи ишлар вазири Файсал бин Фарҳон ал-Сауд қиролликда валиаҳд шаҳзода Муҳаммад бин Салмон Исроил бош вазири Бинямин Нетаньяху ва АҚШ давлат котиби Майкл Помпео ўртасида ўтказилган махфий учрашув ҳақидаги оммавий ахборот воситаларида берилган хабарларни рад этди. Бу ҳақда «Интерфакс» хабар берди.

«Мен давлат котиби Помпеони Неом шаҳридаги аэропортда кутиб олдим ва валиаҳд шаҳзода билан учрашувда иштирок этдим. У ерда исроилликлар йўқ эди», — деди вазир Al-Arabiya телеканалига.

Шунингдек, у Twitter’да ОАВ хабар берган учрашув ҳеч қачон бўлмаганлигини ҳамда фақат Саудия Арабистони ва АҚШ вакиллари музокара олиб борганини ёзган.

Аввалроқ Axios янгиликлар портали Исроилдаги манбаларига асосланиб, валиаҳд шаҳзоданинг Нетаньяху ва Помпео билан музокаралари, шунингдек, Моссад директори Ёсси Коэннинг учрашувда иштирок этгани ҳақида хабар берган. Порталнинг таъкидлашича, Нетаньяхунинг идораси ушбу маълумотларни тасдиқламаган, аммо уларни рад ҳам этмаган.

22 ноябрь, якшанба куни Нетаньяхунинг идораси ҳукуматнинг ҳафталик йиғилишини унга кўпроқ тайёргарлик кўриш кераклигини айтиб қолдирган. Бироқ, «учрашувнинг кейинга қолдирилишининг асл сабаби айнан Нетаньяхунинг Саудия Арабистонига сафари эди», дейилади манбаларда.

Ўз навбатида, Axios’нинг таъкидлашича, де-факто «Исроил ва Саудия Арабистони раҳбарлари ўртасидаги муносабатлар азалдан мавжуд бўлган, аммо улар сир тутилган ва бу қадар юқори даражадаги учрашув, гарчи иккала томон расмий равишда тасдиқламаган бўлса ҳам, манбалар хабар берган биринчи учрашув ҳисобланади».

Шунингдек, Axios Исроил ва Саудия Арабистони АҚШ президентлик сайловларида ғолиблигини эълон қилган Жо Байденнинг Эрон билан ядровий келишувга оид режаларидан хавотирда эканликлигига эътибор қаратди.

Эслатиб ўтамиз, Исроил—Фаластин масаласида олдинга силжиш йўқлигига қарамай, 2020 йилда Дональд Трамп маъмурияти бирданига учта араб мамлакатини яҳудий давлати билан яраштиришга муваффақ бўлди. Сентябрь ойида Баҳрайн ва Бирлашган Араб Амирликлари Исроил билан тинчлик битимларини имзолади (БАА билан қисқа вақт ичида визасиз режим тўғрисида келишувга эришилди), октябрда Судан билан ҳам тинчлик келишувига эришилди.