Бахмалдаги Ахборот-кутубхона маркази очилишида ўқувчи қизларни совуқда юпун кийинтирган тадбир ташкилотчиларига огоҳлантириш берилди, дея хабар бермоқда Бахмал тумани ҳокимлиги.
Ахборот-кутубхона маркази очилиш маросими тасвирланган суратларда туман ҳокими Муса Анарбоев ва бошқа мутасаддилар мавсумий қалин кийимда ҳамда уларнинг олдида ҳаво совуқ бўлишига қарамай, атлас кийим кийган қизчалар тасвирланган. Ушбу ҳолат ижтимоий тармоқларда кескин норозиликларга сабаб бўлди. Ҳокимлик мазкур ҳолат юзасидан қуйидагича изоҳ берди.
«Бахмал туманида 2020 йилнинг 20 ноябрь куни Ахборот-кутубхона маркази очилиш маросими бўлиб ўтган. Туман Ахборот-кутубхона маркази томонидан ташкил этилган очилиш маросимига туман ҳокими иштирокчи сифатида таклиф этилган.
Кутубхона очилишидан хабардор бўлган китобхонлар кутубхона фонди билан танишиш учун ташриф буюрган.
Туман ҳокими ёш болалар совуқ кунда юпан кийинганини тадбирга ташриф буюрганидан кейин гувоҳи бўлган. Ҳаво совуқлиги боис очилиш маросими ташқарида тахминан 5-6 дақиқа давом этган.
Тадбир якунлангач туман ҳокими тадбир ташкилотчиларига кичик йиғилиш ўтказди. Мазкур йиғилишда туман ҳокими тадбирни ташкилий қисми нега айнан бинонинг ичида ўтказилмагани юзасидан кескин муносабат билдирган.
Куни кеча ижтимоий тармоқларда чиқарилган эътирозлар юзасидан расмдаги ўқувчилар ва уларнинг ота-оналари билан суҳбат жараёнида мазкур ҳолатда фарзандларининг узоқ вақт ташқарида қолиб кетмагани сабабли эътирозлари йўқ эканлиги билдирилган.
Тадбир ташкилотчиларига қонуний тартибда ўз хизмат вазифасини бажараётган вақт йўл қўйган камчиликлари юзасидан огоҳлантириш берилди», – дейилади туман ҳокимлиги хабарида.
Маълумот учун, Муса Анарбоев Бахмал туманига 2018 йил 3 апрелдан буён ҳокимлик қилиб келяпти. Шунингдек, у 2007–2009 йиллар давомида Жиззах вилояти ҳокими сифатида ҳам ишлаган.
Эслатиб ўтамиз, шу йилнинг январь ойида Фарғонанинг Чўнғарасига ташриф буюрган Шуҳрат Ғаниевни атлас кўйлакли қизалоқ нон билан кутиб олганди. Ҳоким ва сафдошлари қалин кийимда, қизча эса юпқа атлас кўйлакда тургани ижтимоий тармоқларни жунбишга келтириб, кўплаб танқидий пост ва изоҳлар ёзилгач ҳокимлик матбуот хизмати муносабат билдириб, қизча атиги икки дақиқа очиқ ҳавога чиққанини ёзганди.
22 ноябрь куни эса ижтимоий тармоқларда Андижон шаҳридаги 43-мактаб ўқувчиларининг совуқда икки қатор бўлиб, юпун кийимларда байроқ кўтариб маҳаллий амалдорларни кутиб олаётгани акс этган сурат тарқалди. Болалар 19 ноябрь куни «Янги Ўзбекистон — янгича дунёқараш» шиори остида Ўзбекистонда кўзга кўринган зиёлилар, санъат, фан-маданият ходимлари ҳамда фаол нуронийлардан иборат тарғибот гуруҳини кузатгани олиб чиқилгани маълум бўлган.
Андижон вилоят халқ таълими бошқармаси расмий муносабатида расмдаги болалар 2—3 дақиқа ташқарида қолишгани, сўнг синф хоналарига киришгани айтилган. Воқеадан сўнг ушбу мактаб директори ва унинг ўринбосари ишдан олинган.
Изоҳ (0)