Каттақўрғонда электр энергияси узиб қўйилиши оқибатида фермер хўжаликларига етказилган 1 млрд 54 млн сўмлик зарар ундирилади

Самарқанд вилоятининг Каттақўрғон туманида электрсиз қолган иссиқхона бир кечада 35 минг доллар зарар кўргани ҳақида хабар берилган эди. Zarnews’нинг маълум қилишича, хабар ўрганиб чиқилганда мазкур ҳолат ҳақиқатан ҳам ушбу туманда содир бўлгани аниқланди.

Жумладан, «Каттақўрғон Валижон парранда» МЧЖ раиси М.Улуғмуродов 18 ноябрдан 19 ноябрга ўтар кечаси туман электр тармоқлари корхонаси томонидан 6 соат мобайнида электр энергияси узиб қўйилиши оқибатида 1 гектар майдондаги иссиқхонада экилган помидор музлаб қолиши оқибатида 231 миллион сўм зарар кўрганини баён этиб, Каттақўрғон туман прокуратурасига мурожаат қилган.

Тумандаги «Муродулла бобо» фермер хўжалиги раҳбари Ф.Насруллаев эса иссиқхонасидаги 1 гектар майдондаги помидор ва 1 гектар ердаги бодринг кўчатлари ва ҳосилининг музлаб қолиши оқибатида 823 миллион сўм моддий зарар кўрган.

Фермер хўжаликлари ва электр тармоқлари корхоналари ўртасида тузилган шартномага кўра, таъминотчи истеъмолчига электр энергиясини етарли миқдорда ва узлуксиз етказиб бериши лозим бўлган.

Шартнома шартлари бузилгани ва мажбурият бажарилмагани сабабли Каттақўрғон тумани прокуратураси 23 ноябрь куни мазкур ҳолатлар юзасидан «Самарқанд ҳудудий электр тармоқлари» акциядорлик жамиятидан фермер хўжаликларига етказилган 1 миллиард 54 миллион сўм моддий зарарни ундириш юзасидан Каттақўрғон туманлараро иқтисодий судига даъво аризаси киритган.

Қайд этилишича, тадбиркорлар манфаатини ҳимоя қилиш ва уларга етказилган зарар ундирилиши шахсан вилоят прокурори назоратига олинди.

Аввалроқ Энергетика вазирлиги иссиқхоналар муқобил ёқилғи таъминотига эга бўлиши кераклигини маълум қилгани ҳақида хабар берилган эди.

Эслатиб ўтамиз, республика бўйлаб электр энергияси таъминоти билан боғлиқ муаммолар юзага келгани сабаб Танзила Норбоева газ ва электр муаммоси махсус кўриб чиқилиши, ялпи мажлисда кўтарилиши, Президентга ахборот берилишини айтди. Энергетика вазирлиги Ўзбекистонда электр энергияси таъминотидаги узилишларнинг асосий сабаби ҳавонинг совиб кетиши натижасида электр энергияси истеъмолининг кескин ортиши эканлигини маълум қилди.