O‘zbekiston Jinoyat kodeksida mansabdor shaxs tomonidan noqonuniy tarzda boylik orttirganlik uchun jinoiy javobgarlik belgilashni taklif etilmoqda. Bu haqda O‘zbekiston Respublikasi Korrupsiyaga qarshi kurashish milliy kengashining 2-yig‘ilishida ma’lum qilingan.
Yig‘ilishda Korrupsiyaga qarshi kurashish xalqaro standartlarini qonunchilikka implementatsiya qilishni davom ettirish bo‘yicha “yo‘l xaritasi” loyihasi muhokama etildi. Loyihada korrupsiya xavf-xatariga eng ko‘p duch keladigan davlat xizmatchilarining faoliyat sohalari va lavozimlari ro‘yxatini shakllantirish, xorijiy davlat mansabdor shaxslariga va xalqaro tashkilotlarining vakillariga pora berganlik uchun jinoiy javobgarlikni belgilash, korrupsiya holatlari to‘g‘risida anonim xabar yo‘llash va ularni ko‘rib chiqish bo‘yicha normativ-huquqiy hujjat loyihasini ishlab chiqish ko‘zda tutilgan.
Shuningdek, loyihadan Jinoyat kodeksida mansabdor shaxs tomonidan noqonuniy tarzda boylik orttirganlik uchun jinoiy javobgarlikni belgilash, Xalqaro tashkilotlar tomonidan ajratilgan qarzlar va moliyaviy yordamlar sarfining oshkoraligini ta’minlash uchun ochiq ma’lumotlar bazasini shakllantirish masalalari ham o‘rin olgan.
Telegram’’dagi “davletovuz” kanalining yozishicha, mansabdor shaxs tomonidan noqonuniy tarzda boylik orttirganlik uchun jinoiy javobgarlik BMTning Korrupsiyaga qarshi kurashish to‘g‘risidagi konvensiyasi 20-moddasida (noqonuniy boylik orttirish) aks etgan. Unga ko‘ra, amaldorning xarajati daromadiga munosib bo‘lishi lozim. Ya’ni mansabdor dang‘illama uyi, chet elda dam olishi yoki to‘layotgan krediti summasi va boshqa daromadlarining kelib chiqishini isbotlay olmasa, bu o‘z-o‘zidan korrupsiya sifatida baholanishi kerak.
Izoh (0)