Ўзбекистон Жиноят кодексида мансабдор шахс томонидан ноқонуний тарзда бойлик орттирганлик учун жиноий жавобгарлик белгилашни таклиф этилмоқда. Бу ҳақда Ўзбекистон Республикаси Коррупцияга қарши курашиш миллий кенгашининг 2-йиғилишида маълум қилинган.
Йиғилишда Коррупцияга қарши курашиш халқаро стандартларини қонунчиликка имплементация қилишни давом эттириш бўйича «йўл харитаси» лойиҳаси муҳокама этилди. Лойиҳада коррупция хавф-хатарига энг кўп дуч келадиган давлат хизматчиларининг фаолият соҳалари ва лавозимлари рўйхатини шакллантириш, хорижий давлат мансабдор шахсларига ва халқаро ташкилотларининг вакилларига пора берганлик учун жиноий жавобгарликни белгилаш, коррупция ҳолатлари тўғрисида аноним хабар йўллаш ва уларни кўриб чиқиш бўйича норматив-ҳуқуқий ҳужжат лойиҳасини ишлаб чиқиш кўзда тутилган.
Шунингдек, лойиҳадан Жиноят кодексида мансабдор шахс томонидан ноқонуний тарзда бойлик орттирганлик учун жиноий жавобгарликни белгилаш, Халқаро ташкилотлар томонидан ажратилган қарзлар ва молиявий ёрдамлар сарфининг ошкоралигини таъминлаш учун очиқ маълумотлар базасини шакллантириш масалалари ҳам ўрин олган.
Telegram’’даги «davletovuz» каналининг ёзишича, мансабдор шахс томонидан ноқонуний тарзда бойлик орттирганлик учун жиноий жавобгарлик БМТнинг Коррупцияга қарши курашиш тўғрисидаги конвенцияси 20-моддасида (ноқонуний бойлик орттириш) акс этган. Унга кўра, амалдорнинг харажати даромадига муносиб бўлиши лозим. Яъни мансабдор данғиллама уйи, чет элда дам олиши ёки тўлаётган кредити суммаси ва бошқа даромадларининг келиб чиқишини исботлай олмаса, бу ўз-ўзидан коррупция сифатида баҳоланиши керак.
Изоҳ (0)