Samarqandlik erkak savdo markazlarining birida rashk sabab xotini va uning o‘ynashi deya taxmin qilingan shaxsni pichoqlab qo‘ydi, deb xabar beradi Telegram’dagi STV kanali. Bosh prokuratura matbuot kotibi ushbu holat rostan ham sodir bo‘lganini tasdiqladi.
Ko‘ngilsiz hodisa 20-noyabr kuni soat taxminan 18:00 larda Mirzo Ulug‘bek ko‘chasida joylashgan savdo markazida sodir bo‘lgan. 42 yoshli pastdarg‘omlik erkak do‘konda turmush o‘rtog‘i va uning o‘ynashi deya taxmin qilingan shaxsga duch kelgan va odamlar orasida ularga pichoq bilan tashlangan. Ta’kidlanishicha, jabrlanuvchilar qon ketishi oqibatida voqea joyida vafot etgan.
Bosh prokuraturaning ma’lum qilishicha, gumonlanuvchi qotillik fakti bo‘yicha qo‘lga olingan, Samarqand prokuraturasi Jinoyat kodeksining 97-modda 2-qismi “a, j” bandlari bo‘yicha jinoyat ishini qo‘zg‘atgan. Tergov harakatlari olib borilmoqda.
Avvalroq Jizzaxda qiz o‘z onasini pichoqlab o‘ldirib qo‘ygani, shuningdek, Yuqori Chirchiqda o‘z akasini do‘pposlab, pichoqlagan shaxs qo‘lga olingani to‘g‘risida xabar berilgandi.
Izoh (0)