Onlayn o‘yinlarni to‘g‘ridan to‘g‘ri translyatsiya qilish bilan shug‘ullanadigan (strimer) qiz 2020-yil davomida 550 ming dollar ishlab topdi, deb xabar beradi “4PDA.ru”.
Yil boshidanoq 2020-yil “strimerchi”lar uchun haqiqiy muvaffaqiyat olib kelishi ma’lum edi. Hamma uyda o‘tiradi, ekranlarga termulib, bekorchilikka vaqt sarflaydi — bu kabi odamlarning kayfiyatini ko‘tara olgan inson esa muvaffaqiyatga erishadi. E’lon qilingan ma’lumotlarga ko‘ra, Twitch videostriming servisi 2020-yilda haqiqiy oltin koniga aylangan.
Jurnalistlar Twitch orqali qolganlardan ko‘ra eng ko‘p daromad to‘plagan 10 nafar qizning ro‘yxatini tuzdi — Top-10 ro‘yxatning oxirida joylashgan Becca niki ostidagi geymerning daromadi ham hayratlanarli: u 43 985 dollar ishlab topgan. Pokimane niki ostida geymer qiz esa 2020-yilda 550 ming dollar ishlab topib, ro‘yxatning eng yuqori pog‘onasidan o‘rin olgan.
Ma’lum qilinishicha, qizlar daromadining 70 foizi obunadan keladi, 23 foizi — reklama va 8 foizigina donatlardan. Shu bilan birga, qizlar erkak strimerlardan ancha orqada: xuddi shu kabi ro‘yxatning boshida joylashgan erkak-stimerning 2020-yildagi daromadi qariyb 2 million dollarni tashkil etgan.
Eslatib o‘tamiz, oktabrda o‘zbekistonlik Rahim Abramov Rossiyaning eng serdaromad tiktokeri deb topilgani, u bir yilda 10 million rubl ishlab topgani to‘g‘risida xabar berilgandi.
Izoh (0)