Armaniston hukumatining uch a’zosi — mudofaa vaziri David Tonoyan, mehnat vaziri Zarui Batoyan va favqulodda vaziyatlar vaziri Feliks Solakyan iste’foga chiqdi. Tegishli farmonlar mamlakat prezidenti Arman Sarkisyan tomonidan imzolangan, deb yozmoqda Meduza.
O‘zining iste’fosiga izoh berar ekan, Tonoyan buni mamlakatdagi keskinlik darajasini pasaytirishga urinish deb atadi. “Hozirgi vaziyat keskinlik darajasini pasaytirishni talab qilmoqda. Mening ketishim aynan shu mantiq bilan qabul qilinishini istayman”, — dedi mudofaa vaziri.
Vagarshak Arutyunyan yangi mudofaa vaziri, Mesrop Arakelyan mehnat vaziri, Andranik Piloyan Favqulodda vaziyatlar vazirligining boshlig‘i bo‘ldi.
Armanistonda ikki haftadan buyon Tog‘li Qorabog‘da o‘t ochishni to‘xtatish to‘g‘risidagi bitim imzolangani sababli siyosiy inqiroz davom etmoqda. Bitimga ko‘ra, Ozarbayjon mintaqa hududining katta qismini oldi. Muxolifat Pashinyan “xoinlik” shartnoma imzolangani sababli iste’foga chiqishini talab qilmoqda.
16-noyabr kuni Armaniston tashqi ishlar vaziri Zograb Mnatsakanyan iste’foga chiqqandi. Bungacha Pashinyan vazirni uning nazorati ostida ikki yil davom etgan muzokaralar jarayoni “hududlarni topshirishni qaytarib bo‘lmas darajaga olib kelganida” ayblagan.
Izoh (0)