Rossiyaning Yakutsk shahri rahbari Sardana Avksentyeva meriya binosini sotish niyatini ma’lum qildi, deb yozadi “Gazeta.uz”. “Ortiqcha narsalarning barchasidan qutulishda davom etamiz. Shahar budjetini to‘ldirish uchun juda zarur bo‘lgan yangi manbalar”, — deb yozgan u o‘z Facebook’ida.
“Meriya binosini sotishga tayyorlashni boshlaymiz. Dastlab shohko‘chadagi, sal keyinroq — Oktabr va Gogol ko‘chalaridagi. Shahar mulkini sotish — qat’iy belgilab qo‘yilgan jarayon. Manfaatdor bo‘lgan potensial xaridorlar bor, ammo barchasiga rioya qilgan holda, ochiq o‘tkazish kerak. Aks holda shubha qilishni boshlashadi va men o‘z do‘stlarim yoki qarindoshlarimga ‘arzonga’ sotganimni aytishadi”, — deya qayd etdi mer.
“Mening fikrimcha, shahar mansabdorlari shaharning qoq markazidagi qimmatbaho binoda o‘tirishi shart emas. Biz arzon bino qurib, u yerga ko‘chib o‘tishga tayyormiz. Masalan, mening birinchi o‘rinbosarim 17-dahaga ko‘chishni taklif qilmoqda. Buni qo‘llab-quvvatlayman”, — deb yozdi Sardana Avksentyeva.
“Bino yangi formatda, har bitta mansabdor bittadan kirib yashirinib oladigan ko‘p sonli kabinetlari yo‘q. Hamma bir-birini ko‘rib turishi mumkin bo‘lgan bitta xona. Aholining qulayligi uchun markazda bitta front-ofis tashkil qilamiz”, — deya aniqlik kiritdi shahar rahbari.
Bundan tashqari, uning so‘zlariga ko‘ra, meriya tez orada xizmat maqsadlarida taksida yurish dasturini sinovdan o‘tkazishni boshlaydi.
“Avtotransport bilan ta’minlash qimmatga tushadi. Masalan, Moskvada avtotransport xizmatidan yil boshidayoq voz kechganmiz. Xizmat safarlarida hammamiz bemalol metroda yuramiz, ba’zi holatlarda taksidan foydalanamiz”, — dedi u.
Sardana Avksentyeva 2018-yilda Yakutsk tarixida mer lavozimini egallagan birinchi ayolga aylandi. Uning g‘alabasi siyosiy sensatsiya deb ataldi. Saylanganidan keyin u shahar apparatiga va xizmat avtomobillariga xarajatlarni qisqartira boshladi, noinsof mansabdorlar va pudratchilarni ishdan bo‘shatdi.
Sardana Avksentyeva internetda juda mashhur, uning o‘zi ijtimoiy tarmoqlarda yozib, aholi bilan uchrashuvlar haqida gapirib beradi, shaharni rivojlantirish va uning muammolarini hal qilish rejalari bilan bo‘lishadi.
Mavzuga doir: Rossiyaliklar farovon hayotning asosiy mezonini aytdi
Izoh (0)