Senegalda (G‘arbiy Afrikada joylashgan) 200 ga yaqin kishi noma’lum kasallikka chalindi, ular ochiq okeanda uni yuqtirib olgani taxmin qilinmoqda, deb yozadi “RBK”.
“Avval bemorlar 82 kishi edi, ammo keyinroq kamida 200 kishi unga chalingani haqida xabar berishdi”, — dedi mamlakat poytaxti joylashgan viloyat gubernatori Hasan Sal.
Hukumat ma’lumotlariga ko‘ra, kasallikni yuqtirib olganlarning barchasi Atlantika okeanining bitta joyida baliq ovlagan. Kasallanganlar paydo bo‘lgach, ushbu hududda baliq ovlash vaqtinchalik taqiqlandi, tahlil uchun suvdan namunalar olinadi.
Senegalning Sud Quotidien gazetasi ma’lumotlariga ko‘ra, bemorlarda qasmoq toshib, butun badani va ko‘zlari qichishadi. Yana bir nashr Le Soleil yozishicha, jabrlangan baliqchilar tanalarining okean suviga teggan qismlari eng ko‘p zararlanganini aytmoqda.
Shunday simptomlarga ega bemorlarning barchasi qirg‘oq bo‘yida joylashgan Ryufiks shahrida izolyatsiya qilinmoqda. U okeanning xavfli ekanligi taxmin etilayotgan hududiga yaqin joylashgan. Kasallanganlar uchun shahar stadioni ajratildi.
Sentabr oxirida Rossiyaning Kamchatka yarim oroli aholisi dengiz jonivorlari yoppasiga qirg‘oqqa chiqib qolib, halok bo‘layotgani haqida xabar bergandi. Kronotskiy qo‘riqxonasi xodimlari ifloslangan akvatoriyada 10—15 metr chuqurlikdagi suvosti organizmlarining 90 foizdan ortig‘i halok bo‘lgan, degan xulosaga kelgandi. Mahalliy syorferlar ham suvda suzgandan keyin ko‘zlari achishgani va ko‘ngil aynigani haqida shikoyat qilgan.
Hodisaning aniq sababini aniqlab bo‘lmadi, tekshiruvlar natijasida neft mahsulotlari sizib chiqqani yoki raketa yoqilg‘isi qoldiqlari tushib qolgani aniqlanmadi, jabrlanganlarda esa zaharlanish qayd etilmadi. Asosiy versiyaga ko‘ra, bunga tabiiy hodisalar, zaharli suv o‘tlari sabab bo‘lgan bo‘lishi mumkin.
Mavzuga doir: Kamchatkadagi ekologik inqiroz — suratlarda
Izoh (0)