Арманистон ҳукуматининг уч аъзоси — мудофаа вазири Давид Тоноян, меҳнат вазири Заруи Батоян ва фавқулодда вазиятлар вазири Феликс Цолакян истеъфога чиқди. Тегишли фармонлар мамлакат президенти Арман Саркисян томонидан имзоланган, деб ёзмоқда Meduza.
Ўзининг истеъфосига изоҳ берар экан, Тоноян буни мамлакатдаги кескинлик даражасини пасайтиришга уриниш деб атади. «Ҳозирги вазият кескинлик даражасини пасайтиришни талаб қилмоқда. Менинг кетишим айнан шу мантиқ билан қабул қилинишини истайман», — деди мудофаа вазири.
Вагаршак Арутюнян янги мудофаа вазири, Месроп Аракелян меҳнат вазири, Андраник Пилоян Фавқулодда вазиятлар вазирлигининг бошлиғи бўлди.
Арманистонда икки ҳафтадан буён Тоғли Қорабоғда ўт очишни тўхтатиш тўғрисидаги битим имзолангани сабабли сиёсий инқироз давом этмоқда. Битимга кўра, Озарбайжон минтақа ҳудудининг катта қисмини олди. Мухолифат Пашинян «хоинлик» шартнома имзолангани сабабли истеъфога чиқишини талаб қилмоқда.
16 ноябрь куни Арманистон ташқи ишлар вазири Зограб Мнацаканян истеъфога чиққанди. Бунгача Пашинян вазирни унинг назорати остида икки йил давом этган музокаралар жараёни «ҳудудларни топширишни қайтариб бўлмас даражага олиб келганида» айблаган.
Изоҳ (0)