Toshkent ekologiya va atrof-muhitni muhofaza qilish boshqarmasi 17-noyabr kuni ijtimoiy tarmoqlarda Chilonzor tumanidagi Gagarin ko‘chasida joylashgan daraxtlarning noqonuniy kesilishi holati bo‘yicha joylashtirilgan post yuzasidan o‘rganish ishlarini olib bordi. Bu haqda qo‘mita matbuot xizmati xabar berdi.
Toshkent shahar ekologiya va atrof-muhitni muhofaza qilish boshqarmasi tomonidan holat o‘rganilganda, Chilonzor tuman obodonlashtirish boshqarmasi tomonidan aholining ko‘p sonli murojaatlariga asosan yuqorida bayon etilgan manzilda qurigan daraxtlarni sanitar kesish yuzasidan xulosa taqdim etish to‘g‘risida murojaat qilingan. Mazkur murojaat joyiga chiqib o‘rganilgan hamda fuqarolarning sog‘lig‘i hamda yuridik va jismoniy shaxslarning mol-mulkiga zarar yetkazilishining oldini olish maqsadida qonun hujjatlarida belgilangan tartibda tegishli hujjatlar rasmiylashtirilgan, oltita qurigan hamda kasallangan daraxtlarga xulosa berilgan.
18-noyabr kuni Davlat ekologiya qo‘mitasi, Toshkent shahar ekologiya va atrof-muhitni muhofaza qilish boshqarmasi, Chilonzor tumani Obodonlashtirish boshqarmasi hamda jamoatchilik vakillaridan iborat guruh holat joyiga chiqib, bayon etilgan masalani joyida o‘rgandi.
“Davlat ekologiya qo‘mitasi o‘rganish yakunlariga muvofiq oltita daraxt tabiiy omillar ta’sirida zararlanib, qurigan daraxtlar qonuniy kesilganligini, shuningdek, bir dona chinor daraxti Chilonzor tumani Obodonlashtirish boshqarmasi xodimlari tomonidan noqonuniy kesilgan”, — deyiladi xabarda.
Eslatib o‘tamiz, 2020-yilning fevralida Toshkentda noqonuniy daraxt kesganlardan salkam 2 milliard so‘m moddiy zarar undirilgani, ikki nafar ayblanuvchiga nisbatan garov ehtiyot chorasi qo‘llanilgani to‘g‘risida xabar berilgandi.
Izoh (0)