Sirdaryo va Nurafshon tumanlari hokim o‘rinbosarlari daraxtlarni noqonuniy kesishga buyruq berdi

Sirdaryo tuman hokim o‘rinbosari buyrug‘i bilan “Sholikor” mahallasidagi 1 tup archa hamda 1 tup qayrag‘och kesib tashlangani yuzasidan viloyat nazorat inspeksiyasi tomonidan o‘rganish tadbirlari o‘tkazildi. Bu haqda Ekologiya va atrof muhitni muhofaza qilish davlat qo‘mitasi xabar berdi.

O‘rganish tadbirlari davomida 1 tup archa va 1 tup qayrag‘och daraxtlari tag qismidan kesilgani aniqlangan. Daraxtlarni kesish ishlari davom etayotgan paytda ish inspeksiya xodimlari tomonidan to‘xtatib qolingan.

“Xodimlarimiz tomonidan daraxt kesish ishlarini olib borayotgan fuqarolardan bunga ruxsat beruvchi tegishli hujjatlar so‘ralganda, ular qo‘lida hech qanday hujjati yo‘qligi va bu topshiriq ‘tepadan’, ya’ni tuman hokimi o‘rinbosaridan bo‘lganini aytishdi.

Holat bo‘yicha ‘Sholikor’ MFY raisi Rasuljon Abduraimovning ham ko‘rsatmasi olindi. Unga ko‘ra, mahalla raisi Xudoyberdi Najmullayevga hududda daraxt kesish mumkin emasligini ko‘p bora tushuntirishga uringan, ammo hokim o‘rinbosari unga ‘kim kelsa, o‘zim javob beraman’, qabilida javob bergan”, — deyiladi xabarda.

Sirdaryo viloyati Ekologiya va atrof-muhitni muhofaza qilish boshqarmasi nazorat inspeksiya xodimlari tomonidan tuman hokim o‘rinbosari Xudoyberdi Najmullayevga nisbatan “Tabiatni muhofaza qilish to‘g‘risida”gi qonun talablariga muvofiq tabiatga yetkazilgan zarar miqdori 11 707 500 so‘m hisoblandi. To‘plangan hujjatlar 6-aprel kuni huquqni muhofaza qilish organlariga taqdim qilingan.

Shuningdek, Toshkent viloyati Nurafshon shahar hokimining qurilish ishlari bo‘yicha o‘rinbosari Bunyod Saidxo‘jayevning buyrug‘i bilan shahardagi “Begaltepa” mahalla hududida 10 tup daraxt kesib tashlangan.

Davlat ekologiya qo‘mitasi mahalla hududida 9 tup archa va 1 tup chinor daraxtlari tag qismidan kesilgan hamda 1 tup chinor daraxti o‘sishdan to‘xtash darajasigacha shikastlantirilgani aniqlangan.

“Ko‘rsatilgan manzilda daraxtlarni kesish ishlarini olib borayotgan fuqarolardan bunga ruxsat beruvchi tegishli hujjatlar so‘ralganda, ular qo‘lida hech qanday hujjati yo‘qligi va daraxtlarni kesish uchun Nurafshon shahar hokimining qurilish ishlari bo‘yicha o‘rinbosaridan topshiriq bo‘lganini ma’lum qilgan.

Shundan so‘ng o‘zini Nurafshon shahar hokimining qurilish ishlari bo‘yicha o‘rinbosari Bunyod deb tanishtirgan shaxs kelib, mahalla hududida yo‘l qurilish ishlari olib borilayotgani va shu munosabat bilan daraxtlarni kesish ishlari boshlaganini aytgan”, — deyiladi xabarda.

U o‘z so‘zida, shuningdek, daraxt kesish uchun “Yagona darcha”dan ruxsat olinganini ham qo‘shimcha qilgan. Holat bo‘yicha hokim o‘rinbosaridan yozma ravishda tushuntirish so‘ralganda, uni berishdan bosh tortgan va daraxt kesish ishlarini olib borayotgan shaxslarni ham tarqatib yuborgan.

Ma’lum bo‘lishicha, ushbu holatda tabiatga yetkazilgan zarar miqdori 109 million 270 000 so‘mni tashkil qilgan. Hozirda to‘plangan hujjatlar huquqni muhofaza qilish organlariga taqdim etish uchun tayyorlanmoqda.

Bundan tashqari, Ellikqal’a tuman inspeksiyasi tomonidan o‘tkazilgan reyd tadbiri davomida Ellikqal’a tumani Bo‘ston shahrida yashovchi fuqaro N.M. tomonidan noqonuniy ravishda 6 tub oq terak kesilganligi aniqlandi.

Holat yuzasidan huquqbuzar fuqaroga nisbatan tegishli hujjatlar rasmiylashtirilib, Ma’muriy javobgarlik to‘g‘risidagi kodeksning 79-moddasi 1-qismi (Daraxtlar, butalar, boshqa o‘rmon o‘simliklari va nihollarni g‘ayriqonuniy ravishda kesish, shikastlantirish yoki yo‘q qilish)ga asosan 1 115 000 so‘m jarima va tabiatga yetkazilgan zararni qoplash uchun 2 876 700 so‘m da’vo belgilandi.