Тошкент экология ва атроф-муҳитни муҳофаза қилиш бошқармаси 17 ноябрь куни ижтимоий тармоқларда Чилонзор туманидаги Гагарин кўчасида жойлашган дарахтларнинг ноқонуний кесилиши ҳолати бўйича жойлаштирилган пост юзасидан ўрганиш ишларини олиб борди. Бу ҳақда қўмита матбуот хизмати хабар берди.
Тошкент шаҳар экология ва атроф-муҳитни муҳофаза қилиш бошқармаси томонидан ҳолат ўрганилганда, Чилонзор туман ободонлаштириш бошқармаси томонидан аҳолининг кўп сонли мурожаатларига асосан юқорида баён этилган манзилда қуриган дарахтларни санитар кесиш юзасидан хулоса тақдим этиш тўғрисида мурожаат қилинган. Мазкур мурожаат жойига чиқиб ўрганилган ҳамда фуқароларнинг соғлиғи ҳамда юридик ва жисмоний шахсларнинг мол-мулкига зарар етказилишининг олдини олиш мақсадида қонун ҳужжатларида белгиланган тартибда тегишли ҳужжатлар расмийлаштирилган, олтита қуриган ҳамда касалланган дарахтларга хулоса берилган.
18 ноябрь куни Давлат экология қўмитаси, Тошкент шаҳар экология ва атроф-муҳитни муҳофаза қилиш бошқармаси, Чилонзор тумани Ободонлаштириш бошқармаси ҳамда жамоатчилик вакилларидан иборат гуруҳ ҳолат жойига чиқиб, баён этилган масалани жойида ўрганди.
«Давлат экология қўмитаси ўрганиш якунларига мувофиқ олтита дарахт табиий омиллар таъсирида зарарланиб, қуриган дарахтлар қонуний кесилганлигини, шунингдек, бир дона чинор дарахти Чилонзор тумани Ободонлаштириш бошқармаси ходимлари томонидан ноқонуний кесилган», — дейилади хабарда.
Эслатиб ўтамиз, 2020 йилнинг февралида Тошкентда ноқонуний дарахт кесганлардан салкам 2 миллиард сўм моддий зарар ундирилгани, икки нафар айбланувчига нисбатан гаров эҳтиёт чораси қўлланилгани тўғрисида хабар берилганди.
Изоҳ (0)