Франция соғлиқни сақлаш вазири Оливье Веран қайтадан жорий қилинган карантин шарофати билан мамлакатда коронавируснинг иккинчи тўлқини авж нуқтасидан ўтиб олишга муваффақ бўлганини маълум қилди. 10 кун ичида касалланиш билан боғлиқ янги ҳолатлар анча камайган, деб ёзади «Korrespondent.net».
«Биз эпидемия устидан назоратни қайта тикладик, бу — яхши янгилик», — деди вазир.
Франция 30 октябрда қайтадан карантин эълон қилган эди. У 1 декабргача давом этиши керак. Айнан шу жиддий чекловлар коронавирус тарқалишини секинлаштирди, деди Оливье Веран.
«Бу бизга эпидемиянинг авж нуқтасидан ўтдик, деб ҳисоблаш имконини беради», — дея таъкидлади ССВ раҳбари, аммо у жамоавий ҳаракатларни сусайтиришга ҳали эрта эканлигини қўшиб қўйди.
Францияда ўтган бир кеча-кундузда 27 228 та касалланиш ҳолати қайд этилди. 302 киши вафот этди. Ноябрь бошида мамлакатда энг юқори кўрсаткич қайд этилган — бир кунда 62 минг киши коронавирусга чалинган эди.
Октябрь охирида карантин ҳақида мамлакат президенти Эммануэль Макрон эълон қилган эди. У оммавий тадбирлар бекор қилиниши, кўп сонли одамлар тўпланадиган жойлар, хусусан, бар ва ресторанлар ёпилиши, бунинг имконияти бўлган барча корхоналарда масофадан ишлаш формати жорий этилишини айтганди. Шундан сўнг 30 октябрдан 1 декабргача умумий карантин жорий қилинди. Улгуржи савдо муассасалари, мактаблар ва мактабгача таълим муассасалари, мактабдан ташқари машғулотлар ўтказувчи муассасалар, меҳмонхоналар, барча соғлиқни сақлаш муассасалари, жамоат транспорти ўз ишини давом эттиради.
6 ноябрдан эса Парижда COVID-19 туфайли тунда озиқ-овқат етказиб бериш ва спиртли ичимликлар сотиб олиш тақиқланди.
Изоҳ (0)