Rossiyada 16-noyabr tonggi holatga ko‘ra, koronavirusga chalinish bilan bog‘liq 22 778 ta yangi holat qayd etildi, deb xabar bermoqda Meduza. Bu sutkalik kasallanishlar soni bo‘yicha yangi rekord. Avvalgi rekord — sutkasiga 22 702 ta kasallanish holati 14-noyabr kuni qayd etilgandi.
Yangi aniqlangan kasallanish holatlarining aksariyati Moskva (6360 ta) va Sankt-Peterburg (2039 ta) shaharlari, Moskva (810) hamda Nijniy Novgorod (403 ta) viloyatlarida kuzatilgan.
Mavzuga doir: Moskva meri Sergey Sobyanin shahar aholisining qanchasi koronavirusga chalinib chiqqanini aytdi
So‘nggi bir kecha-kunduzda infeksiyadan 303 kishi, pandemiya boshlanganidan buyon esa 33 489 kishi vafot etgan.
Sog‘ayganlar soni 1 453 849 nafarni tashkil etmoqda, shulardan 13 864 nafari so‘nggi sutkada tuzalib chiqqan.
“Rospotrebnadzor” ma’lumotlariga ko‘ra, mamlakatda koronavirusni aniqlash bo‘yicha so‘nggi 24 soat ichida 534 mingta, umumiy hisobda esa 69,1 milliontadan ortiq test o‘tkazilgan.
Rossiyalik virusolog, professor Viktor Zuyevning aytishicha, mamlakatda epidemiologik vaziyat 2021-yil yozida barqarorlashadi. “Vektor” virusologiya va biotexnologiya davlat ilmiy markazi bosh direktori o‘rinbosari Aleksandr Agafonovning fikricha, koronavirus infeksiyasi ustidan nazoratni vaksina yordamida o‘rnatish mumkin.
Izoh (0)