Давлат хавфсизлик хизмати Чегара қўшинлари бошқарма бошлиғи ўринбосари Абдулҳамид Абдураҳмонов 13 ноябрь куни АОКАда ўтказилган брифингда черагадан ўтиш билан боғлиқ аҳолини қизиқтирган саволларга жавоб берди.
Хусусан, махсус комиссия баёнига асосан 1 октябрдан бошлаб чегарадан ўтишга рухсат берилганига қарамай, нима учун айримлар чегарадан ўта олмаётгани сабабини тушунтирди.
«Давлат чегараси орқали ўтказиш бир давлатнинг эмас, балки икки томоннинг рухсати билан амалга оширилишини ҳисобга олган ҳолда Ташқи ишлар вазирлиги қўшни давлатлар билан бу борада бир қатор тадбирлар ўтказди. Ташқи ишлар вазирлиги ҳамкорлигида, шунингдек, қўшни давлатлар чегара қўшинлари билан келишган ҳолда Давлат чегарасидан фуқароларни ўтказиш масаласида баъзи натижаларга эришилди.
Жумладан, жорий йилнинг 1 сентябридан Қирғизистон Республикаси билан чегарадаги ўтказиш пунктлари фаолияти тикланди, 16 октябрь кунидан — Афғонистон Ислом Республикаси, 23 октябрь кунидан — Қозоғистон Республикаси билан чегарада маълум бир тоифадаги фуқароларнинг ҳаракатланишига рухсат берилди.
Туркманистон томони эпидемиологик вазиятдан келиб чиқиб киритилган чекловларни ўзгаришсиз қолдириш фикрини билдирди. Тожикистон томони ҳозирда ушбу масалани кўриб чиқмоқда.
Шунингдек, Республика махсус комиссиясининг тегишли қарорига асосан, темир йўл ва ҳаво транспортида мунтазам рейслар хорижий давлатлар билан келишган ҳолда йўлга қўйилишига рухсат берилган», — дейди Абдулҳамид Абдураҳмонов.
Шунингдек, хорижий давлатлардан кириб келиши мумкин бўлган вирус ташувчилари борасида қандай чоралар кўрилаётганини айтиб ўтган.
«Хорижий давлатлардаги эпидемиологик вазиятига қараб ‘қизил’, ‘сариқ’ ва ‘яшил’ тоифаларга бўлинишини ҳисобга олиб, фуқаролар тегишли санитар-карантин қоидаларига риоя этган ҳолда кириб келадилар. Бунда, эпидемиологик вазият барқарор ‘яшил’ давлатда сўнгги 14 кун давомида бўлган шахс, агар унда касаллик белгилари аниқланмаса, Ўзбекистон Республикаси ҳудудига тўғридан-тўғри киритилади.
‘Сариқ’ ва ‘қизил’ тоифага киритилган давлатлардан кириб келган фуқаро тасдиқланган шаклдаги мажбуриятнома бланкасини тўлдиради, ўз ҳисобидан экспресс тест текширувидан ўтади ва натижасига қараб тиббиёт муассасаларига даволанишга ёки уйига карантинга юборилади», — деган ДХХ Чегара қўшинлари вакили.
Эслатиб ўтамиз, Республика махсус комиссиясининг қарори билан 2020 йил 1 октябрдан мавжуд карантин ва санитария-гигиена талабларига қатъий риоя этган ҳолда Ўзбекистонга авиация, темир йўл ва автойўл ўтказиш пунктлари орқали кириб-чиқишга рухсат берилган.
Изоҳ (0)