O‘zbekiston Tashqi ishlar vazirligida O‘zbekiston bosh vazirining maslahatchisi M.Xayriddinov, Bandlik va mehnat munosabatlari vazirining birinchi o‘rinbosari E.Muhitdinov va Rossiyaning O‘zbekistondagi elchisi V.Tyurdenev ishtirokida uchrashuv tashkil etildi, deya xabar bermoqda “Xalq so‘zi Online”.
Uchrashuvda koronavirus pandemiyasi paytida O‘zbekiston fuqarolarini Rossiyada tashkillashtirilgan holda ishga jalb qilish masalasi, O‘zbekiston va Rossiyaning vakolatli organlari tomonidan ishlab chiqilayotgan migratsiya sohasidagi shartnomalar loyihalarining bugungi kundagi holati muhokama qilindi.
Bugungi kunda mamlakatda aholi bandligini ta’minlash, ayniqsa, karantin cheklovlari sababli chet elga ishlash uchun ketolmagan fuqarolarni Rossiyadagi yirik qurilish obyektlari, ishlab chiqarish va xizmat ko‘rsatish sohalariga jalb qilish borasida ishlar amalga oshirilayotgani ta’kidlandi.
Uchrashuvda ikki mamlakat migratsiya sohasida yaqin hamkorlik qilishga tayyor ekanligi bildirildi.Shuningdek, O‘zbekiston tomoni fuqarolarni Rossiyaga ishga joylashtirish masalasida Rossiya hukumatidan ruxsat olish bo‘yicha bir nechta takliflar berdi. Berilgan takliflarni Rossiya tomoni muhokama qilib, natijasi bo‘yicha ma’lum qilinishini ta’kidladi.
Muzokaralar yakunida tomonlar pandemiya davrida O‘zbekiston fuqarolarini tashkillashtirilgan holda Rossiyada ishga jalb qilish, xususan, mamlakat hududiga kirishga va ishlash uchun ruxsat olish, mehnat migrantlarini tashkillashtirilgan holda jo‘natish, karantinda bo‘lish kabi jarayonlarni soddalashtirish yuzasidan qo‘shma chora-tadbirlar ishlab chiqish bo‘yicha kelishuvga erishildi.
Ayni paytda uchrashuvda bildirilgan barcha fikrlar bo‘yicha Rossiya tomonidan takliflar olinishi kutilmoqda.
Avvalroq Rossiyaning Kemerovo shahri aeroporti qurilishida ishlash uchun 164 nafar, “Gazprom” zavodi atrofidagi qurilishlarda ishlash uchun 231 nafar hamda Amur viloyatidagi zavod qurilishida ishlash uchun 346 nafar o‘zbekistonlik jo‘nab ketgani xabar qilingandi.
Izoh (0)