Ўзбекистон Ташқи ишлар вазирлигида Ўзбекистон бош вазирининг маслаҳатчиси М.Хайриддинов, Бандлик ва меҳнат муносабатлари вазирининг биринчи ўринбосари Э.Муҳитдинов ва Россиянинг Ўзбекистондаги элчиси В.Тюрденев иштирокида учрашув ташкил этилди, дея хабар бермоқда «Халқ сўзи Online».
Учрашувда коронавирус пандемияси пайтида Ўзбекистон фуқароларини Россияда ташкиллаштирилган ҳолда ишга жалб қилиш масаласи, Ўзбекистон ва Россиянинг ваколатли органлари томонидан ишлаб чиқилаётган миграция соҳасидаги шартномалар лойиҳаларининг бугунги кундаги ҳолати муҳокама қилинди.
Бугунги кунда мамлакатда аҳоли бандлигини таъминлаш, айниқса, карантин чекловлари сабабли чет элга ишлаш учун кетолмаган фуқароларни Россиядаги йирик қурилиш объектлари, ишлаб чиқариш ва хизмат кўрсатиш соҳаларига жалб қилиш борасида ишлар амалга оширилаётгани таъкидланди.
Учрашувда икки мамлакат миграция соҳасида яқин ҳамкорлик қилишга тайёр эканлиги билдирилди.Шунингдек, Ўзбекистон томони фуқароларни Россияга ишга жойлаштириш масаласида Россия ҳукуматидан рухсат олиш бўйича бир нечта таклифлар берди. Берилган таклифларни Россия томони муҳокама қилиб, натижаси бўйича маълум қилинишини таъкидлади.
Музокаралар якунида томонлар пандемия даврида Ўзбекистон фуқароларини ташкиллаштирилган ҳолда Россияда ишга жалб қилиш, хусусан, мамлакат ҳудудига киришга ва ишлаш учун рухсат олиш, меҳнат мигрантларини ташкиллаштирилган ҳолда жўнатиш, карантинда бўлиш каби жараёнларни соддалаштириш юзасидан қўшма чора-тадбирлар ишлаб чиқиш бўйича келишувга эришилди.
Айни пайтда учрашувда билдирилган барча фикрлар бўйича Россия томонидан таклифлар олиниши кутилмоқда.
Аввалроқ Россиянинг Кемерово шаҳри аэропорти қурилишида ишлаш учун 164 нафар, «Газпром» заводи атрофидаги қурилишларда ишлаш учун 231 нафар ҳамда Амур вилоятидаги завод қурилишида ишлаш учун 346 нафар ўзбекистонлик жўнаб кетгани хабар қилинганди.
Изоҳ (0)