Qashqadaryo viloyatining Mirishkor tumanida 66 yoshli chol va uning 62 yoshli kampiri o‘ldirilib, yoqib yuborildi. Bu haqda “Daryo”ga xabar bergan marhumlarning o‘g‘li va kelini jinoyat ishida qarindoshining qo‘li borligini aytmoqda.
“2020-yil 4-oktabr kuni kechki payt bolamni emizib, uxlashga yotdik. Birozdan so‘ng derazamizning tagidan yugurib o‘tgan kishining oyoq tovushlari eshitildi. Avvaliga qaynotam bo‘lsa kerak deb o‘yladim, so‘ngra qaynotam keksa kishi bo‘lsa, qanday yuguradi deb o‘yladim. So‘ng jim bo‘ldi. Keyin yotdim. Soatini bilmayman, birozdan so‘ng yana eshigim tortildi. Tashqaridan ‘Shalola, Shalola’ deb chaqirishdi. Turmush o‘rtog‘im uyda yo‘q edi. Chaqirgan odam erimmikin deb ‘Sizmisiz’ dedim. Indamadi-da, eshikni tortdi. Eshik ochilib ketdi. Bolam sovqotmasin deb, eshikni yopish uchun o‘rnimdan turdim. Eshik oldidagi ‘odyol’ni ko‘tarib, eshikni yopishga uringanimda kimdir boshimga mushtlab urdi. Yiqilib tushdim. Keyin o‘rnimdan turganimda ikki yoshli bolamning qo‘lidan ushlab, boshi bilan yerga urayotgan ekan. ‘Besh yil deganda farzandli bo‘ldim. Bolamni urmang, dedim. Xo‘p, unda seni uramiz, deya yana meni urib ketdi. Meni urayotgan odamning ko‘zi va qoshi tanish bo‘lganidan kimligini bilish uchun yuzidagi ro‘molini tortdim. Ko‘rsam, o‘zimizning Panji tog‘amiz ekan”, — deydi marhumlarning ayni kunda shifoxonada davolanayotgan kelini Shalola Jo‘rayeva.
Shalola Jo‘rayevaning aniqlik kiritishicha, u Panji tog‘amiz deb atayotgan kishi ularga qarindosh bo‘lib, qaynopasining turmush o‘rtog‘i, ya’ni marhumlarning kuyovi bo‘lgan.
Marhumlar kelinining ma’lumot berishicha, uni uyiga kirib kaltaklagan kishidan tashqari sheriklari ham bo‘lgan.
“Panji tog‘a meni urayotgan paytda tashqaridan to‘rt-besh kishining ovozi eshitildi. Ular ‘Ibrohim kelyapti’ deyishdi. Shundan keyingi voqealarni eslolmayman. Sababi boshimni yorishgan ekan. Ko‘zimni ochsam, shifoxonada ekanman”, — deydi Shalola Jo‘rayeva.
Marhum chol-kampirning o‘g‘li, Shalola Jo‘rayevaning turmush o‘rtog‘i Ibrohim Payg‘ambarqulovning ma’lumot berishicha, u uyiga qaytgan paytda xotini va o‘g‘li hushsiz bo‘lgan. Ota-onasi esa o‘ldirilgan. Uyi yoqib yuborilgan.
“O‘sha kuni kechki payt soat 20:50 larda uyga keldim. Mashinamni ichkariga qo‘yib, ‘garaj’ning oldida xotinimni chaqirdim. Keyin derazani taqillatdim. Hech kim gapirmagach uyga kirdim. Kirsam o‘g‘lim va xotinim hushsiz yotgan ekan. Xonada olov yonayotgan ekan. Ularni tashqariga olib chiqib, otam va onamning uyiga qarab yugurdim. Borsam onam eshik oldida xirillab yotgan ekan. Otam esa yotoq joyida yo‘q ekan. Xona yonayotgani uchun tutun hidiga turib bo‘lmasdi. Xonadan chiqib, amakimning uyiga qarab yugurdim”, — deydi Ibrohim Payg‘ambarqulov.
Marhumlar o‘g‘lining aytishicha, u vaziyatdan xabar topgach qarindoshlari va qishloq shifokoriga, shuningdek, hudud profilaktika inspektoriga voqea haqida xabar bergan.
“Qarindoshlarga xabar berib, uyga qaytgan paytimda uyning bir burchagida qorni yorib tashlangan va ko‘krak qismi yonayotgan otamga ko‘zim tushdi. Bilsam otam vahshiylarcha o‘ldirilib, yoqib yuborilgan ekan”, — deydi Ibrohim Payg‘ambarqulov.
Ibrohim Payg‘ambarqulov xotini shifoxonada o‘ziga kelgach bor voqeani unga gapirib berganini aytmoqda.
“Xotinim shifoxonada o‘ziga kelgach voqea haqida so‘radim, — deydi Ibrohim Payg‘ambarqulov. — Xotinim uni urgan va shu ishni qilgan odam opamning turmush o‘rtog‘i Panji ekanligini, uning yuzidagi ro‘molini tortgach yuzini aniq ko‘rganini aytdi.
Aytilishicha, mazkur ishda gumonlanuvchi sifatida qamoqqa olingan Panji ismli shaxs va uning sheriklari hozirda qo‘yib yuborilgan.
“Prokuratura Panji va uning sheriklarini dastlab qamoqqa olgandi. Biroz o‘tib, qo‘yib yubordi. Xotinim uning aybdor ekanligini aytib turgan bo‘lsa-da, prokuratura bunga e’tibor bermayapti. Ular IIB xodimlari Panji va sheriklarini urib, aybni bo‘yniga qo‘ygan bo‘lishi mumkin deyishibdi. Prokuratura Panjining oyoq kiyimidan ota-onamning emas, boshqa ikki shaxsning qon izi chiqqanini aytibdi. Demak, yana bitta ochilmagan jinoyat ishi bormi shunda?”, — deydi Ibrohim Payg‘ambarqulov.
“Daryo” muxbiri bilan suhbatlashgan Mirishkor tuman prokurori Akrom Boboxonovning aytishicha, holat yuzasidan Jinoyat kodeksining 97-moddasi 2-qismi (Ikki yoki undan ortiq shaxsni qasddan o‘ldirish) bilan jinoyat ishi qo‘zg‘atilgan. Hozirda tergov harakatlari olib borilmoqda.
Ibrohim Payg‘ambarqulov hamda Shalola Jo‘rayevaning qo‘shimcha qilishicha, voqeadan bir hafta oldin xonadon kuyovi Panji va uning qarindoshi ularning uyiga kelgan.
“O‘shanda otam pochcham Panjining amakisi Jonqulga ‘Sening o‘n yil oldingi jinoyating haqida xabar berib, 20 yilga qamataman’ degandi, — deydi marhum chol-kampirning o‘g‘li. — Keyin otamdan bu haqda so‘radim. Bilsam Jonqul, pochcham Panji va sheriklari bilan bundan taxminan 10 yil ilgari Nurmahmat ismli o‘g‘lini urib, o‘ldirib qo‘ygan ekan. Keyin esa jinoyatini yashirish uchun o‘g‘lini osib qo‘ygan. Buni otam ko‘rgan ekan. Bular otam jinoyat haqida xabar berib qo‘ymasin, deb onam ikkisini o‘ldirgan”, — deydi marhum chop-kampirning o‘g‘li.
“Daryo” manbasining ma’lumot berishicha, IIB tomonidan gumon qilinuvchi sifatida qamoqqa olingan shaxslar “IIB da qiynoqqa solingani uchun jinoyatni bo‘yniga olyapti” degan taxmin bilan qo‘yib yuborilgan. 2020-yil 4-oktabr kuni sodir bo‘lgan jinoyat ishi esa 11-noyabrga qadar ham ochilmasdan qolmoqda. Jinoyatchilar esa hamon ochiqda yuribdi.
Izoh (0)