Foto: Qashqadaryoda yashil rangga bo‘yalayotgan chim

Ijtimoiy tarmoqlarda Qashqadaryo viloyati ma’muriy markazi Qarshi shahrida yo‘l bo‘yidagi chimlar yashil rangga bo‘yab chiqilayotgani aks etgan foto va videolar tarqaldi. Qayd etish joiz, 12-noyabr kuni Prezident Shavkat Mirziyoyev hududdagi o‘zgarishlar bilan tanishish maqsadida Qashqadaryo viloyatiga jo‘nab ketgan.

Jamoatchilik vakillari, xususan, blogerlar Qashqadaryoda Prezident tashrifi arafasida chimlarning bo‘yab chiqilayotganini qoralab, buni ko‘zbo‘yamachilik holati deb e’tirof etgan. “Yaxshiyam bugun yomg‘ir. Tabiatning o‘zi yolg‘onni yuvishga yordam beradi”, — deb holatga munosabat bildirgan “Mikrofon ko‘targan ayol” kanali muallifi.

Telegram’dagi “Nablyudeniya pod chinaroy” kanali muallifi esa vaziyatni hazil aralash, kinoya bilan shunday izohlagan: “Hamma yerda shunday bo‘lsaydi — iqtisodiyotni, epidemiya va korrupsiyani biror yoqimli rangga bo‘yasak. Suratni bor haqiqatni aytib, mamlakatimiz sha’nini bulg‘amoqchi bo‘lgan Rossiya va AQSh maxsus xizmatlarining josuslari yubordi”.

2017-yil martida, Prezident Shavkat Mirziyoyevning Samarqand viloyatiga tashrifi arafasida ko‘cha tozalash ishlariga jalb qilingan o‘qituvchi Diana Yenikeyeva YTH oqibatida vafot etgan edi; jamoatchilik o‘qituvchining o‘limiga sabab bo‘lgan tozalash ishlarini ko‘zbo‘mayachilik deb atagan edi. Davlat rahbari hodisaga munosabat bildirarkan, “yuragimda bu xuddiki men tufayli yuz bergandek tuyuldi” degan, “o‘zi shunday ishlarga qarshi bo‘lgani”ni alohida ta’kidlagan edi.

“Men osmondan paydo bo‘lib, tushib kelmayman: bir kun oldin qaysi viloyatga tashrif buyurishim haqida ma’lumot yetkaziladi. Lekin, ko‘p joylarda ko‘zbo‘yamachilikka yo‘l qo‘yilmoqda. Ochig‘i, menga bu noqulay, ko‘zbo‘yamachilik menda nafrat uyg‘otmoqda. O‘qituvchilarni majburlab chiqarib qo‘yib, obodonlashtirish, ularga ko‘cha supurtirish, “tayyorgarlik”ka jalb etish — siyosatga xiyonat. Bu harakatlar faqat menga emas, siyosatga ham xiyonat!”, — degandi o‘shanda Prezident Shavkat Mirziyoyev.