Davlat xaridlari portalida Surxondaryo viloyati davlat hokimiyati va boshqaruvi organlari tomonidan amalga oshirilgan qariyb 3 milliard so‘mlik davlat xaridlari haqida ma’lumot berilgan. Unga ko‘ra, Surxondaryo viloyati davlat soliq boshqarmasi 349 million so‘mga Equinox avtomobilini xarid qilgan. Moliya vazirligining ma’lum qilishicha, ularning xati soxtalashtirilgan.
Davlat xaridlari portalida joylashtirilgan hujjatlarga ko‘ra, Davlat soliq boshqarmasiga ushbu rusumdagi mashinani sotib olishga Moliya vazirligi ruxsat bergan.
Ma’lum bo‘lishicha, Moliya vazirligi aslida Equinox olishga emas, balki Nexia-3 avtomobilini xarid qilishga ruxsat bergan. Davlat xaridlari portaliga qalbakilashtirilgan hujjat nusxasi joylashtirilgan.
“Moliya vazirligi tomonidan o‘tkazilgan xizmat surishtiruviga asosan, ijtimoiy tarmoqlarda joylashtirilgan xat, xususan, Surxondaryo viloyat G‘aznachiligiga taqdim etilgan Moliya vazirligining yuqorida qayd etilgan 2020-yil 9-oktabrdagi EC 8724-sonli xati o‘zgartirilganligi, ya’ni ‘Neksiya-3 rusumli’ so‘zlari qalbakilashtirilganligi aniqlandi”, — deyiladi vazirlik xabarida.
Ta’kidlanishicha, holat yuzasidan Bosh prokuraturaga Moliya vazirligining javob xatiga o‘zgartirish kiritgan mansabdor shaxslarga nisbatan qonunchilikda belgilangan tartibda choralar ko‘rilishi yuzasidan o‘rnatilgan tartibda Moliya vazirligining murojaati yo‘llangan.
Davlat soliq qo‘mitasi ham ushbu holatga o‘z munosabatini bildirib, xizmat tekshiruvi boshlanganini ma’lum qilgan.
“Ushbu prinsip asosida holat yuzasidan xizmat tekshiruvi o‘tkazish to‘g‘risida Davlat soliq qo‘mitasi raisining buyrug‘i qabul qilindi. Xizmat tekshiruvi davomida aniqlangan ma’lumotlar qo‘shimcha ravishda e’lon qilinadi”, — deyiladi xabarda.
Avvalroq O‘zbekistonda yangi tashkil etilgan Pillachilik qo‘mitasi 1,5 milliard so‘mga Chevrolet Tahoe, Malibu va Lacetti, Madaniyat vazirligi davlat xaridlari doirasida ikkita Chevrolet Malibu-2 avtomobilini eng qimmat konfiguratsiyasida sotib olgani to‘g‘risida xabar berilgandi.
Izoh (0)