Rossiyaning chiptalarni izlash xizmatini taklif etuvchi Aviasales kompaniyasi barcha xodimlarga ofisdan yoki masofadan turib ishlashni tanlashga imkon berdi. Koronavirus pandemiyasi tugagandan so‘ng bu imkoniyat bekor qilinmaydi. Bu haqda Meduza xabar berdi.
Kompaniyaning kadrlar bo‘yicha direktori Polina Gavraning ta’kidlashicha, pandemiya sababli o‘tgan olti oy davomida ko‘pchilik xodimlar masofadan turib ish olib borgan, ularning ofisda yo‘qligi ish sifatiga ta’sir qilmagan.
“Joyga bog‘lash — bu ibtidoiylik. Rohat olib ishlash kerak. Agar siz o‘zingiz yoqtirgan narsani qilsangiz, qayerda bo‘lishingiz muhim emas: uyda, bizning yuqori darajadagi ofislarimizdan birida, Barselonadagi kovorking markazida yoki Braziliyadagi ijaraga olingan kvartirada”, — deya ta’kidlagan Polina Gavra.
Kompaniyaning PR direktori Yanis Dzenisning aytishicha, kompaniya Rossiyada birinchilardan bo‘lib o‘z xodimlariga ushbu variantni taklif qilgan. “Rossiyada hali hech bir yirik kompaniya doimiy masofadan ishlash imkoniyati haqida gapirmayapti”, — dedi Aviasales vakili.
Koronavirus pandemiyasi fonida ko‘plab kompaniyalar o‘z xodimlariga uydan ishlashga ruxsat berdi. Ushbu qarorlarning aksariyati vaqtincha — cheklovlar bekor qilinib, kasallanish holatlari kamaygach, ular yana ish joylariga qaytishi kerak.
Pandemiyadan keyin ishchilarga masofadan ishlashga ruxsat bergan birinchi yirik kompaniya Twitter bo‘ldi, kompaniya may oyida shunday qarorga kelgan. Oktabr oyida esa Reddit o‘z xodimlariga ushbu imkoniyatni taklif qilgan.
Izoh (0)