Samarqand viloyati hokimi Erkinjon Turdimov “Avtomashinasiz 10 kun” aksiyasini o‘tkazishni taklif qildi, deya xabar bermoqda viloyat hokimligi matbuot xizmati.
Prezident Shavkat Mirziyoyev 30-oktabr kuni “Sog‘lom turmush tarzini hayotga keng tatbiq etish va ommaviy sportni yanada rivojlantirish chora-tadbirlari to‘g‘risida”gi farmonni imzolagan edi. Hujjat bilan rahbar shaxslar shaxsiy namuna ko‘rsatish orqali semizlik darajasini kamaytirish, vazn ko‘rsatkichlarini yaxshilash, salomatlikni mustahkamlashga qaratilgan chora-tadbirlarni amalga oshirishi belgilangan edi.
“Prezident birinchi rahbarlar shaxsiy namuna ko‘rsatishi va sport bilan shug‘ullanishi kerak, odamlarni rag‘batlantirib, sportga jalb etaylik, degan. Shu nuqtai nazardan, men taklif etayapman, davlat idora organlari rahbarlari va barcha xodimlari 11-noyabrdan 21-noyabrgacha ertalab, kechqurun uyidan ishga, ishdan uyiga faqat piyoda boradi. Davlat va shaxsiy mashinani minish yo‘q. Mana men — viloyat hokimi ertalab ishga soat 8 yoki 9 da keladigan bo‘lsam, endi ishga piyoda kelib, kechqurun ham ishdan piyoda ketaman”, — degan hokim.
Viloyat hokimning aytishicha, biror tumanga, masalan, Oqdaryoga borish lozim bo‘lsa, xizmat mashinasi hokimni olib borib, qaytishda uni uyiga emas, ishxonasiga tashlab qo‘yadi va hokim uyiga ishxonasidan piyoda ketadi.
“Ikkinchi chora — yo‘l uzoqroq bo‘lsa, velosiped bor. Uchinchi chora — jamoat transporti. Marhamat, jamoat transportidan foydalaning. Bu orqali mansabdor shaxs ham transportini, ham u qanday qatnayotganini bilib oladi. Tushlik vaqtida, agar uyda tushlik qilsa, xizmat mashinasida ketaverish kerak, chunki tushlikka piyoda borsa uzoq vaqt ketadi”, — deb ta’kidlagan viloyat hokimi.
Erkinjon Turdimov ushbu aksiya “davlatdan oylik oladiganlarga” taalluqli ekanini ta’kidlagan. “Qolganlar bizning taklifimizni qo‘llab-quvvatlasa, nur ustiga a’lo nur. Buni jamoatchilik, jurnalistlar va blogerlar nazorat qilishi kerak”, — dedi u.
“Hokim piyodalar yo‘lagidan uyiga boradi. Agar u yo‘q bo‘lsa, insofi bo‘lsa, keyin piyodalar yo‘lagini qiladi. Bu faqat shahar hokimiga emas, hamma tumandagilarga ham taalluqli”, — deya alohida qayd etib o‘tgan Erkinjon Turdimov.
Eslatib o‘tamiz, Prezidentning nomi yuqorida keltirilgan farmonda 2021-yildan boshlab davlat organlari rahbarlari va barcha xodimlari ish vaqtidan so‘ng haftada kamida bir marta jismoniy tarbiya bilan shug‘ullanishi, shuningdek, odamlarning piyoda yurgani uchun haq to‘lanishi belgilangan.
Izoh (0)