Yer olib berishni va’da qilib, pora bilan qo‘lga tushgan Marhamat tumani hokimi yordamchisiga nisbatan qo‘zg‘atilgan jinoyat ishi sudga yuborildi. Bu haqda Andijon viloyati prokuraturasi axborot xizmati “Daryo”ga ma’lum qildi.
Eslatib o‘tamiz, O‘zbekiston Prezidenti huzurida 15-oktabr kuni o‘tkazilgan yig‘ilishda Andijon viloyati Marhamat tumani hokimi yordamchisi U.A. sentabr oyida yaqin aloqalari orqali Marhamat tumani hududidan 11 gektar yer maydoni ajratish uchun jami 29 ming dollar miqdoridagi noqonuniy pulni olayotgan vaqtda jinoyat ustida ushlangani aytib o‘tilgan edi.
Andijon viloyati prokuraturasi bergan ma’lumotga ko‘ra, fuqaro I.D. hokimlik vakili va bir necha shaxs til biriktirib yer ajratib berish evaziga undan pora talab qilayotganligi haqida huquqni muhofaza qiluvchi idoralarga ariza bilan shikoyat qilgan. Arizada yozilishicha, Marhamat tuman hokimi yordamchisi U.A. fuqaro M.A. va boshqalar orqali tumanidagi fermer xo‘jaligi rahbari I.Yu.ning 11 gektar yer maydonini tuman zaxirasiga qaytarish uchun majburan ariza yozdirib olgan. Hokim yordamchisi tortib olingan yer maydonini fuqaro I.D.ga ajratib berish haqida tuman hokimining qarorini rasmiylashtirish evaziga pul talab qilgan.
Arizaga asosan 11-sentabr kuni prokuratura huzuridagi iqtisodiy jinoyatlarga qarshi kurashish departamenti va DXX xodimlari tomonidan tezkor tadbir o‘tkazilgan. Tadbirda hokim yordamchisi U.A. oldindan tanish bo‘lgan fuqaro Z.T. vositachiligida fuqaro I.D.dan 11 ming dollar olayotgan vaqtda ushlangan.
Ariza muallifi I.D.ga o‘z shikoyatida fuqaro M.A. uni hokim yordamchisi U.A. bilan tanishtirib, ishini bitkazishda bergan ko‘magi evaziga 16 ming dollar talab qilayotganini bayon etgan. Shu bois tezkor tadbir davom ettirilib, fuqaro M.A. arizachi I.D.dan aytilgan pulni olayotgan vaqtida ashyoviy dalillar bilan ushlangan.
I.D o‘rtada vositachilik qilgan yana bir fuqaro X.N. uni fuqaro M.A. bilan tanishtirib, yer maydoni olishda ko‘rsatgan xizmati uchun pul talab qilayotganini ham arizada ko‘rsatib o‘tgan. Tezkor tadbirning uchinchi qismida fuqaro X.N. ariza muallifi I.D.dan 4 ming dollar olayotgan vaqtida qo‘lga olingan.
Mazkur holat yuzasidan Marhamat tumani hokimining yordamchisi U.A. hamda fuqaro A.M. va fuqaro Z.T.ga nisbatan Jinoyat kodeksining 168-moddasi 4-qismi “a” bandi (juda ko‘p miqdorda sodir etilgan firibgarlik) va 28, 211-moddasining 3-qismi “a” (juda ko‘p miqdorda pora berish) bandi bilan jinoyat ishi qo‘zg‘atilgan.
Fuqaro X.N.ga nisbatan esa Jinoyat kodeksining 168-moddasi 2-qismi “b” bandi (bir guruh shaxslar tomonidan oldindan til biriktirib sodir etilgan firibgarlik), 28, 211-moddasi 1-qismi (pora berish) bilan jinoyat ishi qo‘zg‘atilgan.
Tergov harakatlari natijasi bo‘yicha yuqorida keltirilgan shaxslarga nisbatan tegishli ehtiyot choralari qo‘llanilgan. Jinoyat ishi ayblov xulosasi bilan 30-oktabr kuni mazmunan ko‘rib chiqish uchun jinoyat ishlari bo‘yicha Andijon viloyat sudiga yuborilgan.
Prezident raisligida o‘tkazilgan yig‘ilishda Toshkent shahar hokimligi qoshidagi kapital qurilish bosh boshqarmasi boshlig‘i o‘rinbosari, Chilonzor tumanidagi investitsiyalar va tashqi savdo bo‘limi boshlig‘i, Qibray, Chilonzor, Buvayda, Oqqo‘rg‘on, Bo‘stonliq tumani hokimining o‘rinbosari yer maydonini sotayotgan vaqtida jinoyat ustida qo‘lga olingani aytib o‘tilgan.
Izoh (0)