O‘zbekistonda Milliy o‘quv dasturini ishlab chiqishga finlyandiyalik mutaxassislar jalb etiladi

Prezident Shavkat Mirziyoyev 2020-yil 6-noyabr kuni imzolagan farmoniga muvofiq, 2021-yil 1-martga qadar malakali pedagog, ilmiy xodimlar, psixolog va xorijiy ekspertlarni, shu jumladan, Finlyandiyaning malakali mutaxassislarini jalb qilgan holda Milliy o‘quv dasturi ishlab chiqiladi, deya xabar bermoqda Adliya vazirligi.

Tayanch umumta’lim muassasalari belgilanadi va 2021/2022-o‘quv yilida ularning ta’lim jarayoniga dastur tajriba-sinov tariqasida joriy qilinadi.

Shuningdek, 2021-yil 1-martdan pedagog kadrlar tayyorlaydigan OTM hamda litsenziyaga ega nodavlat ta’lim tashkilotlari xalq ta’limi xodimlari malakasini oshirish huquqiga ega bo‘ladi.

Avvalroq O‘zbekistondagi maktablarda 6 fanni birlashtirgan Science fani joriy etilishi, O‘zbekistonda ikkinchi chorakdan barcha o‘quvchilar maktabga borishi majburiy bo‘lishi haqidagi xabarlarga izoh berilgani hamda Monopoliyaga qarshi kurashish qo‘mitasi maktablarni jihozlashdagi monopoliyaga qarshi chiqqani haqida xabar berilgandi.