Qayd etilishicha, 2020-yilning 3-noyabr kuni Samarqand viloyati IIB Xavfsiz turizmni ta’minlash boshqarmasi hamda viloyat IIB Jinoyat qidiruv bo‘limi Iqtisodiy jinoyatlarga qarshi kurashish bo‘limi xodimlari tomonidan tezkor tadbir o‘tkazildi, deya xabar bermoqda Postda.
Tadbir davomida Ishtixon tumani “Azamat” mahalla fuqarolar yig‘ini hududida yashovchi, 1966-yilda tug‘ilgan H. Samarqand tumani “O‘zbek kenti” mahallasida yashovchi S. ismli fuqaroning jiyanini Avtomobil yo‘llari kollejiga o‘qishga kiritib qo‘yishni va’da qilib, undan 400 AQSh dollari miqdoridagi pulni olayotgan vaqtida tezkor xodimlar tomonidan ushlangan. Pora sifatida berilgan pul ashyoviy dalil tariqasida hujjatlashtirib olingan.
Holat yuzasidan Samarqand shahri bo‘yicha IIO FMB huzuridagi Tergov bo‘limi tomonidan Jinoyat kodeksining 168-moddasi 1-qismi (firibgarlik) bilan jinoyat ishi qo‘zg‘atilib, tergov harakatlari olib borilmoqda.
Avvalroq Buxoro viloyati Davlat sanitariya-epidemiologiya nazorati boshqarmasi boshlig‘i pora olayotganida ushlangani, Namanganda SES xodimi koronavirusdan vafot etgan fuqaroning jasadini qarindoshlariga berish uchun 2 million so‘m talab qilgani hamda Farg‘onada moliya bo‘limini aldab, tadbirkorlarning 1,2 mlrd so‘mini “yeb yuborgan” soliqchilar ushlangani haqida xabar berilgandi.
Izoh (0)