Самарқанд вилояти ҳокими Эркинжон Турдимов «Автомашинасиз 10 кун» акциясини ўтказишни таклиф қилди, дея хабар бермоқда вилоят ҳокимлиги матбуот хизмати.
Президент Шавкат Мирзиёев 30 октябрь куни «Соғлом турмуш тарзини ҳаётга кенг татбиқ этиш ва оммавий спортни янада ривожлантириш чора-тадбирлари тўғрисида»ги фармонни имзолаган эди. Ҳужжат билан раҳбар шахслар шахсий намуна кўрсатиш орқали семизлик даражасини камайтириш, вазн кўрсаткичларини яхшилаш, саломатликни мустаҳкамлашга қаратилган чора-тадбирларни амалга ошириши белгиланган эди.
«Президент биринчи раҳбарлар шахсий намуна кўрсатиши ва спорт билан шуғулланиши керак, одамларни рағбатлантириб, спортга жалб этайлик, деган. Шу нуқтаи назардан, мен таклиф этаяпман, давлат идора органлари раҳбарлари ва барча ходимлари 11 ноябрдан 21 ноябргача эрталаб, кечқурун уйидан ишга, ишдан уйига фақат пиёда боради. Давлат ва шахсий машинани миниш йўқ. Мана мен — вилоят ҳокими эрталаб ишга соат 8 ёки 9 да келадиган бўлсам, энди ишга пиёда келиб, кечқурун ҳам ишдан пиёда кетаман», — деган ҳоким.
Вилоят ҳокимнинг айтишича, бирор туманга, масалан, Оқдарёга бориш лозим бўлса, хизмат машинаси ҳокимни олиб бориб, қайтишда уни уйига эмас, ишхонасига ташлаб қўяди ва ҳоким уйига ишхонасидан пиёда кетади.
«Иккинчи чора — йўл узоқроқ бўлса, велосипед бор. Учинчи чора — жамоат транспорти. Марҳамат, жамоат транспортидан фойдаланинг. Бу орқали мансабдор шахс ҳам транспортини, ҳам у қандай қатнаётганини билиб олади. Тушлик вақтида, агар уйда тушлик қилса, хизмат машинасида кетавериш керак, чунки тушликка пиёда борса узоқ вақт кетади», — деб таъкидлаган вилоят ҳокими.
Эркинжон Турдимов ушбу акция «давлатдан ойлик оладиганларга» тааллуқли эканини таъкидлаган. «Қолганлар бизнинг таклифимизни қўллаб-қувватласа, нур устига аъло нур. Буни жамоатчилик, журналистлар ва блогерлар назорат қилиши керак», — деди у.
«Ҳоким пиёдалар йўлагидан уйига боради. Агар у йўқ бўлса, инсофи бўлса, кейин пиёдалар йўлагини қилади. Бу фақат шаҳар ҳокимига эмас, ҳамма тумандагиларга ҳам тааллуқли», — дея алоҳида қайд этиб ўтган Эркинжон Турдимов.
Эслатиб ўтамиз, Президентнинг номи юқорида келтирилган фармонда 2021 йилдан бошлаб давлат органлари раҳбарлари ва барча ходимлари иш вақтидан сўнг ҳафтада камида бир марта жисмоний тарбия билан шуғулланиши, шунингдек, одамларнинг пиёда юргани учун ҳақ тўланиши белгиланган.
Изоҳ (0)