Ер олиб беришни ваъда қилиб, пора билан қўлга тушган Марҳамат тумани ҳокими ёрдамчисига нисбатан қўзғатилган жиноят иши судга юборилди. Бу ҳақда Андижон вилояти прокуратураси ахборот хизмати «Дарё»га маълум қилди.
Эслатиб ўтамиз, Ўзбекистон Президенти ҳузурида 15 октябрь куни ўтказилган йиғилишда Андижон вилояти Марҳамат тумани ҳокими ёрдамчиси У.А. сентябрь ойида яқин алоқалари орқали Марҳамат тумани ҳудудидан 11 гектар ер майдони ажратиш учун жами 29 минг доллар миқдоридаги ноқонуний пулни олаётган вақтда жиноят устида ушлангани айтиб ўтилган эди.
Андижон вилояти прокуратураси берган маълумотга кўра, фуқаро И.Д. ҳокимлик вакили ва бир неча шахс тил бириктириб ер ажратиб бериш эвазига ундан пора талаб қилаётганлиги ҳақида ҳуқуқни муҳофаза қилувчи идораларга ариза билан шикоят қилган. Аризада ёзилишича, Марҳамат туман ҳокими ёрдамчиси У.А. фуқаро М.А. ва бошқалар орқали туманидаги фермер хўжалиги раҳбари И.Ю.нинг 11 гектар ер майдонини туман захирасига қайтариш учун мажбуран ариза ёздириб олган. Ҳоким ёрдамчиси тортиб олинган ер майдонини фуқаро И.Д.га ажратиб бериш ҳақида туман ҳокимининг қарорини расмийлаштириш эвазига пул талаб қилган.
Аризага асосан 11 сентябрь куни прокуратура ҳузуридаги иқтисодий жиноятларга қарши курашиш департаменти ва ДХХ ходимлари томонидан тезкор тадбир ўтказилган. Тадбирда ҳоким ёрдамчиси У.А. олдиндан таниш бўлган фуқаро З.Т. воситачилигида фуқаро И.Д.дан 11 минг доллар олаётган вақтда ушланган.
Ариза муаллифи И.Д.га ўз шикоятида фуқаро М.А. уни ҳоким ёрдамчиси У.А. билан таништириб, ишини битказишда берган кўмаги эвазига 16 минг доллар талаб қилаётганини баён этган. Шу боис тезкор тадбир давом эттирилиб, фуқаро М.А. аризачи И.Д.дан айтилган пулни олаётган вақтида ашёвий далиллар билан ушланган.
И.Д ўртада воситачилик қилган яна бир фуқаро Х.Н. уни фуқаро М.А. билан таништириб, ер майдони олишда кўрсатган хизмати учун пул талаб қилаётганини ҳам аризада кўрсатиб ўтган. Тезкор тадбирнинг учинчи қисмида фуқаро Х.Н. ариза муаллифи И.Д.дан 4 минг доллар олаётган вақтида қўлга олинган.
Мазкур ҳолат юзасидан Марҳамат тумани ҳокимининг ёрдамчиси У.А. ҳамда фуқаро А.М. ва фуқаро З.Т.га нисбатан Жиноят кодексининг 168-моддаси 4-қисми «а» банди (жуда кўп миқдорда содир этилган фирибгарлик) ва 28, 211-моддасининг 3-қисми «а» (жуда кўп миқдорда пора бериш) банди билан жиноят иши қўзғатилган.
Фуқаро Х.Н.га нисбатан эса Жиноят кодексининг 168-моддаси 2-қисми «б» банди (бир гуруҳ шахслар томонидан олдиндан тил бириктириб содир этилган фирибгарлик), 28, 211-моддаси 1-қисми (пора бериш) билан жиноят иши қўзғатилган.
Тергов ҳаракатлари натижаси бўйича юқорида келтирилган шахсларга нисбатан тегишли эҳтиёт чоралари қўлланилган. Жиноят иши айблов хулосаси билан 30 октябрь куни мазмунан кўриб чиқиш учун жиноят ишлари бўйича Андижон вилоят судига юборилган.
Президент раислигида ўтказилган йиғилишда Тошкент шаҳар ҳокимлиги қошидаги капитал қурилиш бош бошқармаси бошлиғи ўринбосари, Чилонзор туманидаги инвестициялар ва ташқи савдо бўлими бошлиғи, Қибрай, Чилонзор, Бувайда, Оққўрғон, Бўстонлиқ тумани ҳокимининг ўринбосари ер майдонини сотаётган вақтида жиноят устида қўлга олингани айтиб ўтилган.
Изоҳ (0)