AQShning Pfizer farmatsevtika kompaniyasi Germaniyaning BioNTech kompaniyasi bilan hamkorlikda yaratilgan koronavirusga qarshi vaksinaning uchinchi bosqich sinovlarining dastlabki yakunlari haqida hisobot berdi. Mazkur ma’lumotlarga ko‘ra, vaksinani qabul qilgan sinov ishtirokchilarida platseboni qabul qilganlarga nisbatan koronavirus bilan kasallanish 90 foiz kamroq kuzatilgan. Bu haqda Meduza xabar berdi.
Kompaniya tomonidan qayd etilishicha, vaksinaning samarali ta’siri emlash boshlanganidan 28 kundan keyin seziladi — bu vaqt ichida bemorga vaksinaning ikkita dozasi jo‘natiladi. Tadqiqotda jami 43 538 nafar ko‘ngilli ishtirok etgan. Ularning hech birida jiddiy ikkilamchi ta’sir kuzatilmagan.
Pfizer kompaniyasi bunday ijobiy natijalar olinishini “fan va insoniyat uchun buyuk kun” deb atagan. Kompaniya tomonidan ta’kidlanishicha, yaqin vaqt ichida barcha statistik ma’lumotlar tahlil qilinadi, shundan so‘ng natijalar retsenziya qilinadigan ilmiy jurnallarda nashr qilinadi, kompaniya esa vaksinani tarqatish uchun tegishli idoralardan ruxsat olish bilan shug‘ullanadi.
Ma’lum qilinishicha, kompaniya 2020-yilning oxirigacha bozorga 50 million doza, 2021-yilda esa 1,3 milliard doza vaksina yetkazib berishga tayyor.
Ayni paytda dunyoda koronavirusga qarshi bir nechta vaksinaning uchinchi — yakuniy bosqichi davom etmoqda. Ularning qatoriga Rossiyaning “Sputnik V” vaksinasi, AstraZeneca va Moderna kompaniyalarining vaksinalari, shuningdek, bir nechta Xitoy vaksinalari kiradi.
Koronavirus pandemiyasi boshlanganidan buyon butun dunyoda 50 milliondan ortiq odam mazkur kasallikka chalingan, 1,26 million kishi kasallik qurboniga aylandi. So‘nggi haftalarda butun dunyoda har kuni 500-600 ming kishida kasallik aniqlanmoqda.
Avvalroq AQSh hukumati BioNTech va Pfizer kompaniyalariga COVID-19 koronavirus infeksiyasiga qarshi 100 million doza BNT162 vaksinasini buyurtma qilgani haqida xabar berilgandi.
Mavzuga doir: Xitoy vaksinasi Toshkentga olib kelindi
Izoh (0)