АҚШнинг Pfizer фармацевтика компанияси Германиянинг BioNTech компанияси билан ҳамкорликда яратилган коронавирусга қарши вакцинанинг учинчи босқич синовларининг дастлабки якунлари ҳақида ҳисобот берди. Мазкур маълумотларга кўра, вакцинани қабул қилган синов иштирокчиларида плацебони қабул қилганларга нисбатан коронавирус билан касалланиш 90 фоиз камроқ кузатилган. Бу ҳақда Meduza хабар берди.
Компания томонидан қайд этилишича, вакцинанинг самарали таъсири эмлаш бошланганидан 28 кундан кейин сезилади — бу вақт ичида беморга вакцинанинг иккита дозаси жўнатилади. Тадқиқотда жами 43 538 нафар кўнгилли иштирок этган. Уларнинг ҳеч бирида жиддий иккиламчи таъсир кузатилмаган.
Pfizer компанияси бундай ижобий натижалар олинишини «фан ва инсоният учун буюк кун» деб атаган. Компания томонидан таъкидланишича, яқин вақт ичида барча статистик маълумотлар таҳлил қилинади, шундан сўнг натижалар рецензия қилинадиган илмий журналларда нашр қилинади, компания эса вакцинани тарқатиш учун тегишли идоралардан рухсат олиш билан шуғулланади.
Маълум қилинишича, компания 2020 йилнинг охиригача бозорга 50 миллион доза, 2021 йилда эса 1,3 миллиард доза вакцина етказиб беришга тайёр.
Айни пайтда дунёда коронавирусга қарши бир нечта вакцинанинг учинчи — якуний босқичи давом этмоқда. Уларнинг қаторига Россиянинг «Sputnik V» вакцинаси, AstraZeneca ва Moderna компанияларининг вакциналари, шунингдек, бир нечта Хитой вакциналари киради.
Коронавирус пандемияси бошланганидан буён бутун дунёда 50 миллиондан ортиқ одам мазкур касалликка чалинган, 1,26 миллион киши касаллик қурбонига айланди. Сўнгги ҳафталарда бутун дунёда ҳар куни 500-600 минг кишида касаллик аниқланмоқда.
Аввалроқ АҚШ ҳукумати BioNTech ва Pfizer компанияларига COVID-19 коронавирус инфекциясига қарши 100 миллион доза BNT162 вакцинасини буюртма қилгани ҳақида хабар берилганди.
Мавзуга доир: Хитой вакцинаси Тошкентга олиб келинди
Изоҳ (0)