O‘zbekiston Madaniyat vazirligi davlat xaridlari portali orqali 2 ta Chevrolet Malibu-2 avtomobilini sotib olish uchun to‘g‘ridan to‘g‘ri shartnoma imzolagan.
Shuningdek, Madaniyat vazirligining Moliya vazirligiga 21-oktabrda yo‘llagan va vazir o‘rinbosari Umidjon Qo‘qonboyev imzolagan xatida 2020-yil 26-maydagi Prezident farmoni bilan vazirlik markaziy apparatining tuzilmasi o‘zgartirilgani, madaniyat vazirining madaniyat muassasalari va havaskorlik san’atini rivojlantirish, raqamlashtirish, axborot texnologiyalari va ta’lim muassasalari bo‘yicha o‘rinbosari lavozimi hamda ushbu yo‘nalish bo‘yicha boshqarma tashkil qilingani bildirilgan.
Shu bilan birga, madaniyat vazirining birinchi o‘rinbosari foydalanayotgan xizmat avtomobilining ma’nan eskirgani qayd etilib, uni ta’mirlashga ortiqcha sarf-xarajatlar qilinayotgani yozilgan. “Gazeta.uz” mashina modeliga aniqlik kiritilmagani, biroq 23-oktabrda Madaniyat vazirligi Epica rusumli avtomobil ta’miriga 1,1 million so‘m sarflaganini aniqlagan.
Madaniyat vazirligi idoraning tasdiqlangan xarajatlar smetasiga 2020-yilda ikkita yangi xizmat avtomobilini xarid qilish uchun mablag‘ kiritilishini so‘ragan.
Ilovada Malibu’ning eng qimmat komplektatsiyasi (LTZ A/T Turbo 2.0) ko‘rsatilgan — har birining narxi 324,4 million so‘m. Jami 657,3 million so‘m mablag‘ ajratilgan va bunda sug‘urta pullari ham hisobga olingan.
Mashinalarni sotib olish bo‘yicha shartnomalar 30-oktabrda Pronto Motor Trade dileri bilan imzolangan.
Avval 2021-yil uchun davlat budjeti loyihasi doirasida Madaniyat vazirligiga ajratiladigan moliyalashtirish mablag‘larini 38,5 foizga oshirish ya’ni 609 milliarddan 843,7 milliardga yetkazish rejalashtirilayotgani ma’lum bo‘lgandi.
Eslatib o‘tamiz, 2020-yil fevral oyida Moliya vazirligi xizmat avtomobillari uchun budjet xarajatlari optimizatsiya qilinishi haqida xabar bergan. Vazirlik hukumat tomonidan 2011-yilda qabul qilingan ushbu yo‘nalishdagi qarorning juda eskirganini qayd etgandi.
Avgust oyida Transport vazirligi davlat organlarining rahbarlari va ularning o‘rinbosarlari foydalanadigan xizmat avtomobillariga GPS o‘rnatish, bu borada qilinayotgan ishlarni jamoatchilik nazoratiga olish va mashinalardan faqat xizmat doirasida foydalanilishini ta’minlash yuzasidan taklif kiritgan.
Avval Zarbdor tumani hokimi Zafar Ro‘ziyev Captiva xizmat mashinasi bo‘la turib, 370 million so‘mga Trailblazer sotib olgani haqida xabar berilgandi.
Izoh (0)