Ўзбекистон Маданият вазирлиги давлат харидлари портали орқали 2 та Chevrolet Malibu-2 автомобилини сотиб олиш учун тўғридан-тўғри шартнома имзолаган.
Шунингдек, Маданият вазирлигининг Молия вазирлигига 21 октябрда йўллаган ва вазир ўринбосари Умиджон Қўқонбоев имзолаган хатида 2020 йил 26 майдаги Президент фармони билан вазирлик марказий аппаратининг тузилмаси ўзгартирилгани, маданият вазирининг маданият муассасалари ва ҳаваскорлик санъатини ривожлантириш, рақамлаштириш, ахборот технологиялари ва таълим муассасалари бўйича ўринбосари лавозими ҳамда ушбу йўналиш бўйича бошқарма ташкил қилингани билдирилган.
Шу билан бирга, маданият вазирининг биринчи ўринбосари фойдаланаётган хизмат автомобилининг маънан эскиргани қайд этилиб, уни таъмирлашга ортиқча сарф-харажатлар қилинаётгани ёзилган. «Gazeta.uz» машина моделига аниқлик киритилмагани, бироқ 23 октябрда Маданият вазирлиги Epica русумли автомобиль таъмирига 1,1 миллион сўм сарфлаганини аниқлаган.
Маданият вазирлиги идоранинг тасдиқланган харажатлар сметасига 2020 йилда иккита янги хизмат автомобилини харид қилиш учун маблағ киритилишини сўраган.
Иловада Malibu’нинг энг қиммат комплектацияси (LTZ A/T Turbo 2.0) кўрсатилган — ҳар бирининг нархи 324,4 миллион сўм. Жами 657,3 миллион сўм маблағ ажратилган ва бунда суғурта пуллари ҳам ҳисобга олинган.
Машиналарни сотиб олиш бўйича шартномалар 30 октябрда Pronto Motor Trade дилери билан имзоланган.
Аввал 2021 йил учун давлат бюджети лойиҳаси доирасида Маданият вазирлигига ажратиладиган молиялаштириш маблағларини 38,5 фоизга ошириш яъни 609 миллиарддан 843,7 миллиардга етказиш режалаштирилаётгани маълум бўлганди.
Эслатиб ўтамиз, 2020 йил февраль ойида Молия вазирлиги хизмат автомобиллари учун бюджет харажатлари оптимизация қилиниши ҳақида хабар берган. Вазирлик ҳукумат томонидан 2011 йилда қабул қилинган ушбу йўналишдаги қарорнинг жуда эскирганини қайд этганди.
Август ойида Транспорт вазирлиги давлат органларининг раҳбарлари ва уларнинг ўринбосарлари фойдаланадиган хизмат автомобилларига GPS ўрнатиш, бу борада қилинаётган ишларни жамоатчилик назоратига олиш ва машиналардан фақат хизмат доирасида фойдаланилишини таъминлаш юзасидан таклиф киритган.
Аввал Зарбдор тумани ҳокими Зафар Рўзиев Captiva хизмат машинаси бўла туриб, 370 миллион сўмга Trailblazer сотиб олгани ҳақида хабар берилганди.
Изоҳ (0)