AQSh prezidentligi saylovida, taxminan, 60 ming amerikalik reper Kanye Uest uchun ovoz berdi. Bu haqda “Interfaks” xabar qildi.
Uestning advokatlari uning ovoz berishda ishtirok etish imkoniyatiga erishishi uchun bir necha oy sarflagan, reperning o‘zi esa ijtimoiy tarmoqlardagi 30 million obunachisi orasida tashviqot ishlarini olib borgan. Ba’zi so‘rovlar reperni aholining 2 foizi qo‘llab-quvvatlashini ko‘rsatgan.
Kamtarona natijasiga qaramasdan, Uest 2024-yilda bo‘lib o‘tadigan prezidentlik saylovida o‘z nomzodini yana bir marta ilgari surishni rejalashtirmoqda.
Kanye Uest saylovoldi kampaniyasini 2020-yilning yozida boshlagan. Uning nomzodi faqat 12 ta shtatda ovoz berishga qo‘yilgan, u eng yaxshi natijani Tennesi shtatida qo‘lga kiritgan — reper uchun 10 mingdan ortiq saylovchi yoki ovoz beruvchilarning 0,3 foizi ovoz bergan.
Kanye Uestdan tashqari, AQSh prezidentligi saylovida g‘alaba qozonish imkoniyati juda kam bo‘lgan boshqa nomzodlar ham qatnashgan. Jumladan, libertarian Joan Jorgensen, ekologiya faoli Xoun Xokins, sobiq aktyor Bruk Pirs, Islohotchi partiya vakili Roke de la Fuente Gerra, ijtimoiy harakat faollari Gloriya La Riva va Elison Kennedi saylovda o‘z nomzodlarini qo‘ygan.
Eslatib o‘tamiz, AQShda prezidentlik saylovi 3-noyabr kuni bo‘lib o‘tdi. Saylovda amaldagi prezident Donald Tramp va demokratlar vakili Jo Bayden asosiy raqiblar sifatida kurash olib bordi. Ayni paytda berilgan ovozlarni sanash jarayonlari davom etmoqda.
Izoh (0)