Демократлар партиясидан АҚШ президентлигига номзод Жо Байден овоз бериш натижаларини хотиржам кутишга чақирди, деб хабар беради «Коммерсантъ».
«Барчадан хотиржам бўлишни сўрайман. Жараён ишлаяпти. Ҳисоб-китоблар якунланмоқда ва тез орада овоз бериш жараёнлари натижасини биламиз», — дейди Байден Уилмингтон шаҳридаги чиқишида.
У яна бир бор ўзининг ғалабасига ишонишини таъкидлаб ўтган: «Овозлар ҳисоб-китоби якунлангач, шубҳасиз, сенатор Харрис ва мени ғолиб деб эълон қилишади». Эслатиб ўтамиз, аввалроқ ҳам Байден ўзининг ғалабасига ишонишини ва президентлик лавозимидаги биринчи иш куниданоқ АҚШни иқлим бўйича Париж битимига қайтаришга тайёр эканлигини билдирган.
АҚШда президентлик сайловлари 3 ноябрь куни бошланган бўлиб, овозлар ҳисоб-китоби ҳамон давом этмоқда. Байден ғалабаси учун сайловчиларнинг 17 та овози етмаяпти, АҚШнинг амалдаги президенти Дональд Трампга эса 56 та овоз керак.
Аввалроқ Дональд Трамп АҚШ президентлиги сайловида берилган овозларни санашни тўхтатишга чақирган эди. Трамп сайлов участкалари ёпилганидан кейин келиб тушган бюллетенларни санаш керак эмаслигини талаб қилмоқда.
Изоҳ (0)