Sanitariya-epidemiologik osoyishtalik va jamoat salomatligi xizmatining Buxoro viloyati boshqarmasi boshlig‘i Ashur To‘xtayev o‘g‘lining to‘yida 53 kishi qatnashgani aniqlandi va unga nisbatan 4 460 000 so‘m miqdorida ma’muriy javobgarlik qo‘llanildi. Bu haqda viloyat Davlat sanitariya-epidemiologiya nazorati boshqarmasiga tayanib, “Daryo” muxbiri Laylo Hayitova xabar bermoqda.
Buxoro viloyat Davlat sanitariya-epidemiologiya nazorati boshqarmasi boshlig‘i o‘rinbosari O‘ktam Safoyevning ma’lum qilishicha, Ashur To‘xtayev 2020-yilning 25-oktabrida Buxoro shahridagi “Ipak yo‘li” restoranida karantin talablariga rioya qilmay, 53 nafar fuqaroni yig‘ib, o‘g‘lining to‘y marosimini o‘tkazganiga oydinlik kiritilgan. To‘yga kelgan mazkur 53 nafar kishi ikkala quda tomonning oila a’zolari, xonandalar hamda to‘y xizmatchilaridan iboratligi aniqlangan.
O‘g‘lining to‘y marosimida pandemiya davrining majburiy qoidalarini buzganligi uchun Ashur To‘xtayevga nisbatan ma’muriy ish materiallari to‘plangan. Hujjatlarga ko‘ra, u “Aholining sanitariya-epidemiologik osoyishtaligi to‘g‘risida”gi qonunining 39-moddasi (aholining sanitariya-epidemiologik osoyishtaligi to‘g‘risidagi qonun hujjatlarini buzganlik uchun javobgarlik) hamda Ma’muriy javobgarlik to‘g‘risidagi kodeksning 54-moddasi 2-qismida (epidemiyalarga qarshi kurash qoidalarini buzish) nazarda tutilgan huquqbuzarlikni sodir etgan, deb topilgan. Shu modda bilan bazaviy hisoblash miqdorining 20 baravari, ya’ni 4 460 000 so‘m jarima jazosi tayinlangan.
Mazkur to‘yni o‘tkazishda to‘y egasini joy bilan ta’minlagan “Ipak yo‘li” restorani rahbari Erkin Jo‘rayev 150 kishi bilan o‘tkazilgan to‘y haqidagi gap-so‘zlarga munosabat bildirganda, uning to‘yxonasida har kuni 80 kishilik marosim o‘tkazilayotgani va bu yuzasidan biror izoh berolmasligini aytgan edi.
“Daryo” muxbirining “Ipak yo‘li” restoranida shu kungacha 30 kishidan ortiq fuqarolarni to‘plash taqiqlangan bo‘lishiga qaramay, har kuni 80 kishi bilan o‘tkazib kelinayotgan boshqa to‘ylar va tadbirkor xatti-harakati nega e’tibordan chetda qolayotgani xususidagi savolga viloyat Davlat sanitariya-epidemiologiya nazorati boshqarmasi boshlig‘i o‘rinbosari O‘ktam Safoyev: “E’tiborni faqat to‘y o‘tkazgan odamga qaratibmiz. Unga nisbatan ham jarima jazosini qo‘llash choralarini ko‘ramiz”, — deya javob qaytardi.
Eslatib o‘tamiz, Sanitariya-epidemiologik osoyishtalik va jamoat salomatligi xizmatining Buxoro viloyati boshqarmasi boshlig‘i Ashur To‘xtayev 25-oktabr kuni o‘g‘lining to‘yini Buxoro shahridagi “Ipak yo‘li” to‘yxonasida o‘tkazgan, marosimda 50 dan ortiq kishi qatnashgani haqida avvalroq xabar berilgandi. Ashur To‘xtayevning o‘z esa bu holatni “o‘zbekchilik” deya izohlagandi.
Izoh (0)