O‘zbekistonda 2020-yilning to‘qqiz oyida jismoniy zo‘ravonlikka uchragan 168 nafar erkak reabilitatsiya markazlariga murojaat qilgan. Bu haqda Mahalla va oilani qo‘llab-quvvatlash vazirligi matbuot kotibi Saodat Boymirzayeva chorshanba kuni AOKAda bo‘lib o‘tgan brifingda ma’lum qildi.
Uning so‘zlariga ko‘ra, hozirgi kunda O‘zbekistonda 197 ta reabilitatsiya markazlari mavjud bo‘lib, ularda og‘ir ijtimoiy ahvolda qolgan va oilaviy muammolar hamda oiladagi zo‘ravonliklarga duch kelgan odamlar anonim ravishda tibbiy, psixologik, ijtimoiy, pedagogik, huquqiy va boshqa turdagi yordamlarni oladi.
Ma’lum qilinishicha, 2020-yilning to‘qqiz oyida markazga 14 849 ta murojaat kelib tushgan. 5796 holatda psixologik, 3680 holatda huquqiy, 503 holatda fuqarolarga tibbiy yordam, 1553 holatda boshqa turdagi yordam ko‘rsatildi.
Markaz psixologlari murojaat qilgan 2577 kishi bilan ish olib borgan va 497 nafar fuqaroga birinchi tibbiy yordam ko‘rsatilib, tibbiy muassasalarga yuborilgan, yana 442 kishi markazlar yotoqxonalariga joylashtirilgan.
Qayd etilishicha, 9870 nafar murojaatchi yoki umumiy sonning 67 foizi faqat huquqiy yoki psixologik maslahat olish uchun kelganligi aniqlandi, ularning murojaatlarida zo‘ravonlik alomatlari topilmadi.
“Shunday qilib, agar 2000 ta holatda yuridik yordam ko‘rsatilgan bo‘lsa, unda yana 1539 kishiga huquqiy maslahat berildi. 217 nafar fuqaroga huquqiy hujjatlarni rasmiylashtirishda yordam ko‘rsatildi, yana 189 nafari himoya orderini olishda ko‘mak berildi. Shuningdek, markaz mutaxassislari sudlarda va boshqa bo‘limlarda 55 kishining vakili sifatida ish olib bordi”, – dedi Saodat Boymirzayeva.
Vazirlik vakili ushbu markazga bolalar va erkaklar murojaat qilgan holatlar mavjudligini qo‘shimcha qildi. Yil boshidan beri jismoniy zo‘ravonlikka uchragan 18 bola va 168 erkak reabilitatsiya markazlariga murojaat qilgan.
https://youtu.be/O5CGCRZYBU8?t=252
Avvalroq O‘zbekistonda Odam savdosi qurbonlarini reabilitatsiya qilish markazini IIV tasarrufiga o‘tkazish taklif qilingan edi.
Izoh (0)