Qashqadaryo viloyati Nishon tumanida “Moskvich” va mototsikl o‘rtasida sodir bo‘lgan yo‘l-transport hodisasi oqibatida bir kishi halok bo‘ldi, deb xabar beradi IIV YHXBB axborot xizmati.
Ma’lumotlarga ko‘ra, 27-oktabr kuni soat 19:05 larda Qarshi—Tolimarjon yo‘lining 38-kilometrida harakatlanib kelayotgan “Moskvich” haydovchisi mototsiklni urib yuborgan.
“Mol bozordan kelayotgan edim, o‘zimni yo‘limda. Damas’ning panasidan qarama-qarshi yo‘nalishga chiqqan mototsikl mashinaga kelib urildi”, — deydi “Moskvich” haydovchisi.
Biroq dastlabki o‘rganishlar xulosasiga ko‘ra, “Moskvich” avtomobili harakatlanish vaqtida yo‘lning qarama-qarshi tomoniga chiqib ketgan bo‘lgan. Yuzaga kelgan YTH oqibatida mototsikl haydovchisi og‘ir tan jarohat olib, shifoxonada vafot etgan.
Hozirda holat yuzasidan Nishon tumani IIB Tergov bo‘limi tomonidan dastlabki surishtiruv-tergov harakatlari olib borilmoqda.
Avvalroq Jizzaxda me’yoriy hujjatlari bo‘lmagan 52 yoshli mototsikl haydovchisi Spark’ga to‘qnashib halok bo‘lgani to‘g‘risida xabar berilgandi.
Izoh (0)